తెలుగుదేశం పార్టీ ఎంపీ జేసి దివాకర్ రెడ్డిని పొలిటికల్ రెబల్ స్టార్ అని పిలుచుకుంటే అతిశయోక్తి కాదు. ఎందుకంటే ఆయన ఏ మాట మాట్లాడినా లోపల ఒకటి బయట ఇంకోటి పెట్టుకుని మాట్లాడరు. సూటిగా సుత్తి లేకుండా మాట్లాడి కొట్టాల్సిన వారిని తన మాటలతో కొట్టేస్తారు. ఆ తర్వాత వాళ్లు ఎలా ఫీలవుతున్నారన్నది ఆయనకు అనవసరం. ఐతే మనసులో ఏదీ దాచిపెట్టుకోరు. కల్మషం లేకుండా చక్కగా చెప్పేస్తుంటారు. తాజాగా మరికొన్ని వ్యాఖ్యలు చేశారు.
అవేంటయా అంటే, 2019లో మళ్లీ ఆంధ్రప్రదేశ్ ముఖ్యమంత్రి పీఠాన్ని చంద్రబాబు నాయుడే అధిష్టించాలన్నది. ఆయననే ప్రజలు రెండోసారి కూడా ముఖ్యమంత్రి చేస్తారని చెప్పుకొచ్చారు. అంతేనా అంటే ఇంకావుంది... వైకాపా చీఫ్ జగన్ మోహన్ రెడ్డికి కుల పిచ్చి ఉన్నదనీ, ఆ కులపిచ్చిని ఆయన వదులుకుని రాజకీయాలు చేయాలన్నారు. జగన్ మోహన్ రెడ్డికి కుల పిచ్చి వుండటం వల్లనే తాను తెలుగుదేశం పార్టీలో చేరినట్లు వెల్లడించారు.
