రాంగోపాల్ వర్మ తీస్తానంటున్న లక్ష్మీస్ ఎన్టీఆర్ చిత్రంపైన ఒకవైపు చర్చ జరుగుతూనే వుంది. ఇదిలావుంటే తాజాగా స్వర్గీయ ఎన్టీఆర్ రెండో భార్య లక్ష్మీపార్వతి ఓ ఇంటర్వ్యూలో మాట్లాడుతూ... ఎన్టీఆర్‌తో పెళ్లికి దారితీసిన పరిస్థితులను వివరించారు. ఎన్టీఆర్ తన పట్ల ఆకర్షితులవడానికి తనేమీ పెద్ద అందగత్తెనేమీ కాదనీ, కేవలం ఆత్మీయతే తామిద్దరిని కలిపిందని చెప్పుకొచ్చారు.
ఎన్టీఆర్ నటించిన ‘సామ్రాట్ అశోక’ చిత్రం షూటింగ్ జరుగుతుంటే తను ఆ షూటింగ్ స్పాటుకు వెళ్లాననీ, అక్కడ ఎన్టీఆర్‌తో పాటు లక్ష్మిగారు కూర్చుని వున్నట్లు చెప్పారు. కొద్దిసేపటికి ఎన్టీఆర్ వద్ద శెలవు తీసుకుంటూ ఇక నేను వెళ్లొస్తానని చెప్పగానే మళ్లీ ఎప్పుడు వస్తారు అని అడిగారనీ, ఆ మాటతో ఆయనలో తన పట్ల వున్న ఆత్మీయత వెల్లడైందన్నారు.
అలా తమ మధ్య మొదలైన అనుబంధం క్రమేపీ బలపడిపోయిందనీ, నరసరావుపేటలో తను నివాసముంటున్న ఇంటికి ఎన్టీఆర్ స్వయంగా ఫోన్ పెట్టించి దాని బిల్లు రూ.3 లక్షలు ఆయనే కట్టారని గుర్తు చేసుకున్నారు. దీన్నిబట్టి ఆయన తన పట్ల ఎంత ప్రేమను చూపించారో అర్థమవుతుందనీ, అలా ఒకరోజు తనను పెళ్లాడుతానంటూ ఆయనే స్వయంగా ప్రపోజ్ చేశారని చెప్పారు. ఐతే కొద్ది సమయం కావాలని చెప్పి ఆ తర్వాత తన మొదటి భర్తకు విడాకులు ఇస్తున్నట్లు ఎన్టీఆర్‌కు చెప్పినట్లు లక్ష్మీపార్వతి వెల్లడించారు.
