ఆర్ధిక శాఖకు చెందిన ర‌హ‌స్యాల‌ను లీక్ చేస్తున్నార‌ని, వివిధ దిన‌ప‌త్రిక‌లకు ప్ర‌త్యేకంగా ప్ర‌తిప‌క్ష నేత‌ల‌కు ఆర్ధిక సమాచారం ఇస్తున్నార‌నే ఆరోప‌ణ‌ల‌తో సి.ఎఫ్.ఎం.ఎస్ ఉద్యోగులు ప‌ది మందిపై తాజాగా సస్పెన్షన్ వేటు వేశారు.
ఆర్దిక శాఖకు చెందిన ముగ్గురు ఉద్యోగుల‌ను రాష్ట్ర ప్రభుత్వం స‌స్పెండ్ చేసి, 24 గంట‌లు కాకుండానే, మరో ప‌ది మందిపై వేటు ప‌డింది. ఆర్ధిక శాఖకు చెందిన ముగ్గురిపై ఆరోప‌ణ‌లు వ‌చ్చాయ‌ని, దాంతో వారిని స‌స్పెండ్ చేస్తున్న‌ట్లు ప్రభుత్వ కార్య‌ద‌ర్శి రావ‌త్ చెప్పారో లేదో... కొద్ది గంట‌ల్లోనే ప్ర‌తిప‌క్ష నేత నారా లోకేష్ సి.ఎఫ్.ఎం.ఎస్. స‌మాచారంతో ఒక ట్వీట్ చేశారు.
ఈ ట్వీట్ మ‌ళ్ళీ కలకలం రేపింది. ఆర్ధిక శాఖకు చెందిన సి.ఎఫ్.ఎం.ఎస్. ఉద్యోగుల కొంప ముంచింది. ప్రభుత్వ ఉద్యోగులపై మరోసారి కన్నెర్ర చేసింది ఏపీ ప్రభుత్వం. ఇబ్రహీంపట్నం సీఎఫ్ ఎం.ఎస్. కార్యాలయంలో మరో 10 మంది ఉద్యోగులపై సస్పెన్షన్ వేటు ప‌డింది. ప్ర‌భుత్వానికి సంబంధించిన విలువైన సమాచారం బయటకు ఇస్తున్నారని అభియోగంతో ఒక్కరోజే 13 మందిపై చర్యలు తీసుకోవడంతో ప్రభుత్వ ఉద్యోగుల్లో కలకలం మొద‌లైంది.
