సినీ నటుడు నందమూరి బాలకృష్ణ ప్రాతినిథ్యం వహిస్తున్న అసెంబ్లీ స్థానం హిందూపూర్. ఇక్కడ ఆయన వ్యక్తిగత సహాయకుడు (పీఏ) రాజశేఖర్ పాలన సాగుతోంది. దీన్ని స్థానిక టీడీపీ నేతలు ఏమాత్రం జీర్ణించుకోలేక పోతున్నారు. దీంతో నేతలంతా ఐక్యమై ఒక రహస్య సమావేశం నిర్వహించారు. ఈ విషయం తెలియగానే బాలకృష్ణతో పాటు టీడీపీ అధిష్టానం కూడా ఉలిక్కిపడింది. పైగా ఈ రహస్య సమావేశంపై ఆరా తీస్తోంది.
ఈ నేపథ్యంలో ఆదివారం రాత్రి రూరల్‌ మండలం కిరికెరలో టీడీపీకి చెందిన కొందరు ప్రజాప్రతినిధులు, నాయకులు రహస్య సమావేశం నిర్వహించారు. ఈ సమావేశంలో చర్చ జరిగిన అంశాలు సోమవారం పార్టీ వర్గాలకు చేరువ కావడంతో నియోజకవర్గంలో రోజంతా చర్చలు సాగాయి. ఈ విషయం అధికార పార్టీతో పాటు ప్రతిపక్షంలోనూ చర్చలకు దారితీసింది.
ముఖ్యంగా కొన్నాళ్లుగా పార్టీలో తటస్థంగా ఉన్న మాజీ ఎమ్మెల్యే సీసీ వెంకటరాముడు, నాయకులు అంబికా లక్ష్మీనారాయణలు ఈ సమావేశానికి హాజరుకావడం మరింత చర్చలకు తెరలేపింది. పార్టీలో కార్యకర్తస్ధాయి నుంచి సీనియర్ నాయకుల వరకు బాలయ్య ఇలాఖాలో ఇలాంటి సమావేశమా? అన్న చర్చలు వినిపించాయి. సమావేశంపై అంతర్గతంగా పార్టీ అధిష్టానం కూడా ఆరా తీసింది.
