తన మాట వినకుండా ఓ అబ్బాయితో సన్నిహితంగా ఉన్నందుకు కన్నబిడ్డ అని కూడా చూడకుండా ఓ తండ్రి అత్యంత కిరాతకంగా ప్రవర్తించాడు. కుమార్తెను గొడ్డలిపై నరికిపారేశాడు. ఒకటి కాదు రెండు కాదు ఏకంగా ఎనిమిది సార్లు గొడ్డలితో నరికేశాడు. దీంతో ఆ యువతి ప్రాణాలు కోల్పోయింది. ఈ దారుణం తెలంగాణ రాష్ట్రంలోని వనపర్తి జిల్లా పెబ్బేరు మండలం, పాతపల్లి గ్రామంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే...
ఈ గ్రామానికి చెందిన రాజశేఖర్-సునీత దంపతులకు ఇద్దరు కుమార్తెలు, కుమారుడు ఉన్నాడు. చిన్నకుమార్తె గీత (15) పెబ్బేరు పట్టణంలోని ప్రభుత్వ బాలిక పాఠశాలలో పదో తరగతి చదువుతోంది. అదే గ్రామానికి చెందిన ఓ బాలుడుతో తన కుమార్తె సన్నిహితంగా మెలగడాన్ని రాజశేఖర్ చూశాడు. దీంతో కుమార్తెను పలుమార్లు మందలించాడు. కుటుంబ పరువు తీయొద్దని, బుద్ధిగా చదువుకోవాలని హితవు పలికాడు.
ఈ క్రమంలో మంగళవారం సునీత పొలం పనులకు వెళ్లగా, మరో కుమార్తె, కుమారుడు ఇంట్లో లేరు. ఆ సమయంలో కుమార్తె గీతకు మరోమారు నచ్చజెప్పే ప్రయత్నం చేశాడు. దీంతో వారిద్దరి మధ్య వాగ్వాదం జరిగింది. దీంతో తీవ్ర ఆగ్రహానికి గురైన రాజశేఖర్.. ఇంట్లో ఉన్న గొడ్డలిని తీసుకని కుమార్తె మెడపై దాడి చేశాడు.
