చర్మానికి మేలు చేయాలంటే.. డార్క్ చాక్లెట్ తినండి అంటున్నారు ఆరోగ్య నిపుణులు. ఇందులోని యాంటీ ఆక్సిడెంట్లూ, ఫ్లేవనాయిడ్లు, ఫ్యాటీయాసిడ్లు ఆరోగ్యానికే కాకుండా చర్మానికి ఎంతో మేలు చేస్తాయి. ఇందులో ఉండే కోకో రక్తప్రసరణపై సానుకూల ప్రభావాన్ని చూపడం వల్ల పరోక్షంగా చర్మానికి మేలు జరుగుతుంది. అలాగే డార్క్ చాక్లెట్‌లోని పోషకాలు అతినీలలోహిత కిరణాల వల్ల చర్మానికి కలిగే హానిని అడ్డుకుంటాయి కూడా. అలాగని అతిగా తింటే మాత్రం మొటిమలతోపాటూ, అధికబరువూ పెరిగే ప్రమాదం కూడా ఉంటుంది.
అలాగే ముఖంపై ముడతలను నివారించుకోవాలంటే.. ఎరుపు రంగు క్యాప్సికంను పచ్చిగా సలాడ్‌ రూపంలో కూడా తీసుకోవచ్చు. ఇందులో సి, బి6 విటమిన్లూ, పీచు, కెరొటినాయిడ్లూ ఉంటాయి. ఈ పోషకాలన్నీ ముడతల్ని నివారిస్తాయి. అదే సమయంలో మొటిమలు రాకుండా అడ్డుకోవడమే కాదు, రక్తప్రసరణ కూడా బాగా జరిగేలా చేస్తాయి. తరచూ దీన్ని తీసుకోగలిగితే వార్థక్యపు ఛాయలు చాలామటుకూ దూరం అవుతాయని ఆరోగ్య నిపుణులు అంటున్నారు.
కొబ్బరినూనె వంటల్లో చెంచా వాడటం ద్వారా ఇన్ఫెక్షన్లను దూరం చేసుకోవచ్చు. కొబ్బరి నూనెలో కెలొరీలు ఎక్కువైనా, లారిక్‌ యాసిడ్‌ సమృద్ధిగా ఇందులో ఉంటుంది. దీనికి యాంటీబ్యాక్టీరియల్‌, యాంటీవైరల్‌ గుణాలు ఉంటాయి. వంటల్లో కొన్ని చెంచాల నూనె వాడినా ఇన్‌ఫెక్షన్లూ, కొన్నిరకాల వైరస్‌లూ దరిచేరవు. విటమిన్‌ ఇ గుణాలు చర్మాన్ని మృదువుగా మారుస్తాయి.
