కాలిఫోర్నియా విశ్వవిద్యాలయానికి చెందిన పరిశోధకులు నిర్వహించిన ఈ అధ్యయనం వివరాలను సైన్స్ జర్నల్‌ ప్రచురించింది. మాలెక్యులార్ డేటింగ్ టూల్స్‌ను, ఎపిడమియలాజికల్ సిమ్యులేషన్స్‌ను ఉపయోగించి ఈ వైరస్ ప్రారంభమైన తేదీని నిర్థారించినట్లు ఈ నివేదిక పేర్కొంది.
ఈ అధ్యయనంలో పాల్గొన్న కాలిఫోర్నియా విశ్వవిద్యాలయం, శాన్ డియాగో స్కూల్ ఆఫ్ మెడిసిన్ అసోసియేట్ ప్రొఫెసర్ జోయెల్ ఓ వర్థీమ్ మాట్లాడుతూ, సార్స్-కోవ్-2ను అధికారికంగా గుర్తించడానికి ముందు అది ఎంత కాలంపాటు చైనాలో వ్యాప్తిలో ఉందో తెలుసుకోవడం కోసం అధ్యయనం నిర్వహించినట్లు తెలిపారు. ఈ ప్రశ్నకు సమాధానం చెప్పడం కోసం మూడు ముఖ్యాంశాలను పరిశీలించామన్నారు.
జీవాణువుల మార్పు రేటు ఆధారంగా గతంలో రెండు లేదా అంతకన్నా ఎక్కువ జీవ రూపాలు వేరుపడిన సమయాన్ని తెలుసుకునే పద్ధతిని మాలెక్యులార్ క్లాక్ అంటారని ఈ అధ్యయనం కో-ఆథర్, అరిజోనా విశ్వవిద్యాలయం ప్రొఫెసర్ మైఖేల్ వోరోబీ చెప్పారు.
ఈ పరిశోధన ఆధారంగా చైనాలో 2019 నవంబరు 4 వరకు సార్స్-కోవ్-2 సోకినవారి సంఖ్య కనీసం ఒకటి కన్నా తక్కువే ఉండవచ్చునని తేలిందన్నారు. 13 రోజుల తర్వాత ఈ వైరస్ సోకినవారు కనీసం నలుగురు ఉండే అవకాశం ఉందని, 2019 డిసెంబరు 1నాటికి తొమ్మిది మందికి సోకి ఉండవచ్చునని అంచనా వేసినట్లు తెలిపారు. ప్రస్తుతం కోవిడ్-19గా పిలుస్తున్న వ్యాధి లక్షణాలుగల ఓ వ్యక్తి వూహన్‌లో 2019 డిసెంబరు మధ్య కాలంలో ఆసుపత్రిలో చేరారు. దీనికి సంబంధించిన మొదటి కేసు ఇదేనని వారు చెప్పారు.
