పూణే టెస్టులో భారత బ్యాట్స్‌మెన్లకు ఆసీస్ స్పిన్నర్ ఓకీఫ్ చుక్కలు చూపిస్తే.. శనివారం బెంగుళూరు వేదికగా ఆస్ట్రేలియాతో జరుగుతున్న రెండో టెస్టులో స్టార్ స్పిన్నర్ నాథన్ లియాన్ అదరగొట్టాడు. ఫలితంగా తొలి ఇన్నింగ్స్‌లో టీమిండియా 189 పరుగులకే ఆలౌటైంది. పూణె టెస్టు మాదిరే మరోసారి ఆస్ట్రేలియా స్పిన్ ఉచ్చులో కోహ్లీ సేన పడింది.
అంతే కాకుండా బెంగళూరు చిన్నసామి స్టేడియంలో ఇంతవరకు ఏ విదేశీ బౌలర్ సాధించని రికార్డును ఈ పిచ్‌పై అత్యధిక వికెట్లు తీసిన తొలి విదేశీ ఆటగాడిగా లియాన్ నిలిచాడు. తొలుత టాస్ గెలిచి బ్యాటింగ్ ఎంచుకున్న భారత బ్యాట్స్‌మెన్లకు నాథన్ లియాన్ చుక్కలు చూపించాడు. ఫలితంగా 22.2 ఓవర్లు బౌలింగ్ చేసిన లియాన్ 4 మెయిడెన్ ఓవర్లు వేసి 2.23 సగటుతో 50 పరుగులిచ్చి 8 వికెట్లు తీసుకున్నాడు.
లియాన్ చేతిలో పుజారా (17), విరాట్‌ కోహ్లీ (12), రహానే (17), రవిచంద్రన్ అశ్విన్‌ (7), వృద్ధిమాన్‌ సాహా (3), రవీంద్ర జడేజా (3), కేఎల్‌ రాహుల్‌ (90), ఇషాంత్‌శర్మ (0) అవుట్ అయ్యారు. ఫలితంగా ఒకే టెస్టులో ఐదు వికెట్లు తీసిన ఐదో పర్యాటక బౌలర్గా నాథన్ లియాన్ నిలిచాడు. అంతేకాదు టీమిండియాపై అత్యధిక వికెట్లు (58) తీసిన ఆస్ట్రేలియా బౌలర్గా కూడా అవతరించాడు. ఫలితంగా 71.2 ఓవర్లలో కేవలం 189 పరుగుల వద్ద టీమిండియా ఆలౌటైంది. తదనంతరం బ్యాటింగ్ దిగిన ఆస్ట్రేలియా తొలి ఇన్నింగ్స్‌లో ఆచితూచి ఆడింది. ఫలితంగా తొలి రోజు ఆట ముగిసే సమయానికి 16 ఓవర్లలో 40 పరుగులు సాధించింది. వార్నర్ (23), రెన్షా (15)లు క్రీజులో ఉన్నారు.
