శరీరంలో చాలినంత ర‌క్తం లేకపోతే రక్తహీనత (ఎనీమియా) అంటారు. దేహంలో తగినంత ఐరన్ లేకపోవడం, విటమిన్ లోపం కూడా ఈ సమస్య ఉత్పన్నమవుతుంది. ఈ తరహా కేసులు ప్రపంచ వ్యాప్తంగా పెరిగిపోతున్నాయి. ముఖ్యంగా స్త్రీలలో ఈ సమస్య ఎక్కువగా కనిపిస్తుంటుంది. సరైన పోషకాహారం లేకపోవడమే రక్తహీనతకు దారితీస్తుంది. చిన్నపిల్లల్లో కూడా ఈ సమస్య ఎక్కువ‌వుతోంది.
గోళ్లు తెల్లగా పాలిపోవడం, నాలుక మీద, కనురెప్పల క్రింద భాగం తెల్లగా ఉండటం, బలహీనంగా ఉండటం, చిన్నచిన్న పనులకే అలసిపోవడం, ఆయాసం రావడం, ఏ ప‌ని చేయాల‌న్నా ఆసక్తి లేకపోవడం త‌దితరాల‌ను రక్తహీనత ల‌క్ష‌ణాలుగా చెప్ప‌వ‌చ్చు. అయితే, ఇలాంటి సమస్యతో బాధపడేవారు ఎలాంటి ఆహారం తీసుకోవాలో తెలుసుకుందాం.
* ఇనుము పుష్కలంగా ఉండే బాదం, జీడిపప్పు, ఎండు ఖర్జూరాల‌ను నిత్యం తీసుకోవాలి.
* రోజుమార్చి రోజు ఖచ్చితంగా తాజా ఆకుకూరలను తీసుకోవాలి. వీటిలో తోటకూర, పుంటి కూర, పాలకూర, మెంతి కూర వంటివి తీసుకోవడం వల్ల రక్తహీనత రాకుండా చూసుకోవచ్చు.
* మొలకెత్తిన పప్పుధాన్యాలు, విటమిన్-సి ఎక్కువగా ఉండే నిమ్మ, ఉసిరి, జామ తీసుకోవడం వల్ల రక్తహీనత లేకుండా చూడొచ్చు.
* సోయాబీన్ తీసుకోవడం చాలా మంచిది. ఎందుకంటే ఇది దేహానికి పోషకాలను గ్రహించే శక్తినిస్తుంది.
* బీట్‌రూట్ తీసుకోవడం ద్వారా మంచి ఫలితం ఉంటుంది. ఇందులో ఉండే ఐరన్, ప్రొటీన్‌లు రక్తాన్ని శుభ్రపరుస్తాయి.
* బీట్‌రూట్ ఆకుల్లో విటమిన్-ఎ అధికంగా ఉంటుంది. బీట్‌రూట్‌ను ఆహారంలో భాగంగా చేసుకోవడం ఉత్తమం.
* నువ్వులను పాలలో నానబెట్టి లేదా బెల్లంతో కలిపి తింటే రక్తహీనత తగ్గుతుంది.
* తేనె కూడా రక్తహీనత బారిన పడకుండా కాపాడుతుంది. ఇందులో ఐరన్, కాపర్, మాంగనీస్ లు పుష్కలంగా ఉంటాయి.
* అరటిపండ్లు, ద్రాక్ష, స్ట్రాబెర్రీ, కిస్‌మిస్, ఉల్లి, క్యారట్, ముల్లంగి, టమాటాలు క్రమం తప్పకుండా తీసుకోవాలి.
* సాధారణ ఉప్పు కంటే అయోడిన్ శాతం ఎక్కువగా ఉప్పును వాడటం ద్వారా ఇనుము లోపం వల్ల వచ్చే రక్త హీనతను నివారించవచ్చు.
