అయ్యయ్యో....! చిన్న పిల్లాడు.. శవమై కొట్టుకొచ్చాడు....!!

మూడేళ్ల బాలుడు.. చాలా చూడ ముచ్చటగా ఉన్నాడు. నడి సముద్రంలో మునిగిపోయాడు. శవమై ఒడ్డుకు కొట్టుకు వచ్చాడు. తల్లిదండ్రులతో ఆనందంగా బయలుదేరిన ఆ చిన్నారి శవమై పడి ఉండడాన్ని చూసి తీరానికి వచ్చిన వారు చలించిపోయారు. వివరాలిలా ఉన్నాయి. 

సిరియాలో ఐఎస్ఐఎస్ ఉగ్రవాదులు సృష్టిస్తున్న మారణహోమం నుంచి ప్రాణాలు కాపాడుకునేందుకు వేల సంఖ్యలో సాధారణ ప్రజలు వలస వెళుతున్నారు. ఇలా వలస వచ్చిన వారి కుటుంబాల్లో ఒకరికి చెందిన మూడేళ్ల బాలుడి మృతదేహం టర్కీ బీచ్‌లో కనిపించింది. గుండెలను పిండేస్తుంది. ఈ బాలుడి మృతదేహం సముద్రం ఒడ్డుకు కొట్టుకువచ్చింది.

సిరియాలోని కుర్దు వర్గానికి చెందిన ఈ బాలుడి పేరు అయిలాన్ కుర్ది. గ్రీకు దీవులను చేరాలన్న ప్రయత్నంలో భాగంగా పడవల్లో వస్తూ మునిగిపోయిన వారిలో ఒకరి సంతానం. ఈ చిత్రాన్ని వాషింగ్టన్ పోస్ట్ బీరూట్ బ్యూరో చీఫ్ లిజ్ స్లై తన ట్విట్టర్ ఖాతాలో పోస్టు చేశారు. చిన్నారికి చెందిన ఇతర చిత్రాలను సిరియా నుంచి సేకరించి వాటినీ పోస్ట్ చేశారు. ఇప్పుడీ చిత్రం, దాని వెనకున్న కథ లక్షలాది షేర్స్ తెచ్చుకుంది.