దేశంలో మహిళలపై అరాచకాలు పెచ్చరిల్లిపోతున్న నేపథ్యంలో.. విదేశాల్లోనూ మహిళలకు భద్రత కరువైంది. స్వీడన్‌లో సభ్య సమాజం సిగ్గుతో తలదించుకోవాల్సిన ఘటన చోటుచేసుకుంది. వివరాల్లోకి వెళితే.. స్వీడన్ రాజధాని స్టాక్ హోమ్‌లో జరిగిన ఈ ఘటనపై నెటిజన్లు తీవ్రస్థాయిలో విరుచుకుపడ్డారు. స్టాక్ హోమ్‌లో 18, 20, 24 ఏళ్ల వయసున్న ముగ్గురు యువకులు 30 ఏళ్ల మహిళపై సామూహిక అత్యాచారానికి పాల్పడ్డారు.
అంతటితో ఆగకుండా ఈ దారుణాన్ని ఫేస్ బుక్‌లో లైవ్ స్ట్రీమ్ చేశారు. ఇంకా ఈ సందర్భంగా తీసిన ఫోటోలను కూడా స్నాప్ ఛాట్‌లో పోస్టు చేశారు. దీంతో ఈ వీడియో సోషల్ మీడియాలో పెను సంచలనం సృష్టించింది. ఫేస్ బుక్‌లోని 60,000 మంది సభ్యులున్న క్లోజ్డ్ గ్రూప్‌లో ఈ వీడియో లైవ్‌లో వచ్చింది.
ఈ దారుణాన్ని చూసిన ఓ యువతి గ్యాంగ్ రేప్‌కు పాల్పడిన దుర్మార్గులపై పోలీసులకు ఫిర్యాదు చేయడంతో సీన్లోకి దిగిన పోలీసులు ఆ ముగ్గురిని అరెస్ట్ చేశారు. ఆ క్లోజ్డ్ గ్రూప్, స్నాప్ ఛాట్ సభ్యులను ఆ వీడియో స్ట్రీమింగ్, ఫోటోలు డిలీట్ చేయాలని సూచించారు. దీనిపై సోషల్ మీడియాలో తీవ్ర విమర్శలు వస్తున్నాయి. గ్యాంగ్ రేప్‌కు పాల్పడినవారు కిరాతకులైతే, ఆ దృశ్యాలను మౌనంగా వీక్షించిన వారు కూడా అంతేనని నెటిజన్లు ఫైర్ అవుతూ సందేశాలు పోస్ట్ చేస్తున్నారు.
