కరోనాను ప్రపంచ దేశాలకు వ్యాపించేందుకు కారణమైన చైనా ఇప్పటికే ప్రపంచ దేశ ప్రజలు గుర్రుగా వున్నారు. మాంసాహారం పేరిట గబ్బిలాలు, పాములను పిచ్చ పిచ్చగా తిని కరోనా వైరస్‌కు చైనా కారణమైందని ఇప్పటికే ప్రపంచ దేశాలు మండిపడుతున్నాయి. ఈ నేపథ్యంలో భారత్ చైనాకు గట్టి వార్నింగ్ ఇచ్చింది.
ఓ వైపు కొవిడ్-19పై ఐరాసలో సమావేశం ఏర్పాటు చేయకపోవడంపై తీవ్ర విమర్శలు ఎదుర్కొంటున్న చైనా నాయకత్వం.. పాకిస్తాన్‌కు మాత్రం వంతపాడింది. వాస్తవానికి కొవిడ్-19పై ఐరాస భద్రతా మండలిలో చర్చ జరగడం చైనాకి ఇష్టం లేదనీ.. అదే జరిగితే వైరస్ వ్యాప్తిపై మరిన్ని నిజాలు బయటికి వస్తాయిని డ్రాగన్ భయపడుతోందని యూఎన్ఎస్‌సీ సభ్యదేశాలు భావిస్తున్నాయి.
''ఐక్య రాజ్య సమితిలో చైనా శాశ్వత ప్రతినిధి జమ్మూ-కాశ్మీర్‌పై చేసిన సూచనలను తిరస్కరిస్తున్నాం. ఈ అంశంపై భారత్ వైఖరి ఏంటో చైనాకి తెలుసు. కేంద్ర పాలిత ప్రాంతమైన జమ్మూ కాశ్మీర్ ఇప్పటికీ, ఎప్పటికీ భారత్‌లో అంతర్భాగమే. జమ్మూ కాశ్మీర్‌కి సంబంధించిన వ్యవహారాలు కూడా భారత్‌లో అంతర్భాగమే...'' అని భారత విదేశాంగ శాఖ ఓ ప్రకటనలో స్పష్టం చేసింది.
జమ్మూ కాశ్మీర్ వ్యవహారంపై ఇంతకుముందు పాకిస్థాన్‌కు చైనా వంతపాడింది. యూఎన్ఎస్‌సీ అజెండాలో కశ్మీర్ అంశానికి ''అత్యధిక ప్రాధాన్యత'' ఇవ్వాలంటూ మార్చి 10న పాకిస్తాన్ తమకు రాసిన లేఖపై వెంటనే స్పందించామని పేర్కొంది. ఈ విషయాన్ని యూఎన్‌ఎస్‌సీలో లేవనెత్తుతామని చెప్పుకొచ్చింది. దీనిపై ఎలాంటి సమావేశం జరక్కుండానే ఐరాసలోని చైనా రాయబారి ఝంగ్ జున్ ఏకంగా పాకిస్తాన్ లేఖను భద్రతా మండలి అధికారిక తీర్మానంలాగా ప్రచారం చేశారు. దీనిపై భారత్ చైనాపై గుర్రుగా వుంది.
