ప్రపంచం మొత్తం కరోనా వైరస్ కోరల్లో చిక్కుకుని తల్లడిల్లిపోతోంది. కానీ, ఉత్తర కొరియా మాత్రం తమ రూటు సెపరేటు అంటూ మరోమారు నిరూపించింది. ఇటీవల కరోనా లక్షణాలు సోకినట్టు అనుమానించిన ఓ అధికారిని ఉ. కొరియా సైన్యం కాల్చిచంపినట్టు వార్తలు వచ్చాయి. ఈ వార్తలపై ఉత్తర కొరియా ఎలాంటి అధికారిక ప్రకటన చేయలేదు.
ఇదిలావుంటే, కరోనా మహమ్మారి వ్యాపిస్తున్న తరుణంలో ఉత్తర కొరియా సైన్యం చిన్న తరహా బాలిస్టిక్‌ క్షిపణులు ప్రయోగించింది. ఈ క్షిపణి ప్రయోగాలను వీక్షిస్తూ ఆ దేశ అధ్యక్షుడు కిమ్ జోంగ్ ఉన్ మాత్రం తాపీగా వీక్షిస్తూ కూర్చుండిపోయారు. అంతేకాదు కరోనాను ఉత్తర కొరియా సమర్థవంతంగా ఎదుర్కొందని తెలియజేసేందుకు ఏకంగా 700 మంది అధికారులు ఒక్కచోట చేరాలని ఆదేశాలు జారీ చేశారు.
అంతేకాకుండా, తమ దేశంలో కరోనా వైరస్ ప్రభావం లేదని చాటి చెప్పేందుకు ఉత్తర కొరియా సుప్రీం పీపుల్స్‌ అసెంబ్లీ శనివారం సమావేశం కానుందని స్థానిక మీడియా వెల్లడించింది. దాదాపు 700 మంది ఉన్నతాధికారులు అంతా ఒక్కచోట చేరి ప్రజల్లో ధైర్యం నింపే ప్రయత్నం చేస్తారని వెల్లడించింది.
