పాకిస్థాన్‌లోని రావల్పిండిలో ఫాదర్‌ ఆఫ్‌ తాలిబన్‌‌గా భావించే, మత గురువు మౌలానా సామ్యూల్ హక్ (82) పాకిస్థాన్‌లో దారుణ హత్యకు గురయ్యారు. గుర్తు తెలియని వ్యక్తులు హక్ గొంతు కోసి హతమార్చారు. హక్ హత్యకు కొన్ని నిమిషాల ముందు ఆయన అనుచరులు బయటికి వెళ్ళిపోయారు. దాంతో అదే అదనుగా భావించిన దుండగులు అయనపై దాడికి తెగబడ్డారు. కత్తితో అత్యంత పాశవికంగా గొంతుకోసి చంపేశారు.
తిరిగి వచ్చిన అంగరక్షకులు.. హక్ రక్తపు మడుగులో పడి ఉండటాన్ని గమనించారు. దాంతో హక్ కుమారుడు హమిదుల్ హక్‌కు సమాచారం అందించారు. ఇటీవల పాకిస్థాన్‌ సుప్రీంకోర్టు దైవదూషణ కేసులో క్రిస్టియన్‌ మహిళకు మరణశిక్షను రద్దు చేయడానికి నిరసనగా చెలరేగిన హింసాకాండలో భాగంగానే హత్య జరిగి ఉంటుందని కుటుంబ సభ్యులు భావిస్తున్నారు.
హక్ హత్య ఉదంతంతో అయన మద్దతుదారులు రావల్పిండి, ఇస్లామాబాద్లో విధ్వంసం సృష్టించారు. ఇక హక్ హత్యపై, పాకిస్తాన్ అంతర్గత మంత్రి, పాకిస్తానీ తాలిబాన్ ఆర్మీ చీఫ్ తదితరులు విచారం వ్యక్తం చేశారు.
