అమెరికా మాజీ అధ్యక్షుడు బరాక్ ఒబామా, ఆ దేశ మాజీ విదేశాంగ మంత్రి హిల్లరీ క్లింటన్ హత్యకు కుట్ర పన్నారా? వారిద్దరి నివాసాలకు భారీ మొత్తంలో పేలుడు పదార్థాలతో కూడిన పార్శిల్స్ పంపారు. ఈ విషయం ఆ దేశ నిఘా వర్గాలు వెల్లడించాయి.
ఈ పేలుడు పదార్థం గురించి తెలియగానే న్యూయార్క్‌లోని పలు కార్యాలయాలను ఖాళీ చేయించారు. ఫైర్ అలారం మోగించినట్టు ఆ దేశ మీడియా వర్గాలు పేర్కొన్నారు. అమెరికా నిఘా, రహస్య విభాగం చేసిన ప్రకటన మేరకు ఈ నెల 23వ తేదీన సాయంత్రం హిల్లరీకి పంపిన పార్శిల్‌ను మొదట గుర్తించారు.
బుధవారం తెల్లవారుజామున ఒబామాకు పంపిన పార్శిల్ వెలుగులోకి వచ్చింది. ఈ పార్శిళ్లలో పేలేందుకు అవకాశమున్న పరికరాలను గుర్తించామని సీక్రెట్ సర్వీస్ అధికారులు చెప్పారు. ఎఫ్‌బీఐ అధికారులు మాట్లాడుతూ తమకూ ఈ అనుమానిత పార్శిళ్ల సమాచారం అందిందని.. దర్యాప్తు అధికారులకు తాము సహకారం అందిస్తున్నామని చెప్పారు. అయితే దీనిపై మాట్లాడేందుకు ఒబామా అధికార ప్రతినిధి నిరాకరించారు.
