అన్నీ అనుకున్నట్టుగా సాగితే వచ్చే నెల 12వ తేదీ నుంచి 19వ తేదీ వరకు చంద్రయాన్-3 ప్రయోగాన్ని చేపడుతామని భారత అంతరిక్ష పరిశోధన సంస్థ (ఇస్రో) ఛైర్మన్‌ ఎస్‌.సోమనాథ్‌ వెల్లడించారు. ఆ తర్వాత కూడా ప్రయోగాన్ని చేపట్టవచ్చని, అయితే ఇందుకు ఇంధనాన్ని ఎక్కువగా వెచ్చించాల్సి వస్తుందని తెలిపారు.
రాకెట్‌ కూర్పు ప్రక్రియ ఈ నెలాఖరుకు పూర్తవుతుందని ఆయన చెప్పారు. ఆ తర్వాత చంద్రయాన్-3ని రాకెట్‌తో అనుసంధానిస్తామని తెలిపారు. దీని ప్రయోగంలో ఎలాంటి ఇబ్బందులు లేకుండా చూసేందుకు వ్యోమనౌకలో అనేక మార్పులు చేపట్టామన్నారు. అందులో అధిక ఇంధనాన్ని జోడించామని, దాని కాళ్లను మరింత బలోపేతం చేశామని పేర్కొన్నారు. ఎక్కువ సౌరశక్తిని ఒడిసిపెట్టేలా పెద్ద సోలార్‌ ప్యానెల్స్‌ అమర్చినట్లు తెలిపారు.
