సాధారణంగా జుట్టు పెంచుకోవడం ఆడవాళ్లకి అందాన్నిస్తుంది. అదే మగవాళ్లకి పూర్తి భిన్నం. కొంచెం జుట్టు పెరిగిన వెంటనే వెళ్లి కత్తిరించుకుంటారు. ఇంకా వేసవికాలంలోనైతే చెప్పనక్కరల్లేదు. కాకపోతే దేవుడికి తలనీలాలు ఇస్తానని మొక్కుకుంటే తప్ప జుట్టుపెంచుకోం. అలాంటిది ఒకటి కాదు రెండు కాదు ఏకంగా 62 అడుగులు పొడవు జుట్టుని ఒక మనిషి పెంచుకుంటున్నాడు. వినడానికి విడ్డూరంగా ఉన్నానిజం.
ఆ వ్యక్తి పేరు సావిభాయి రత్వా.. వయస్సు 60 ఏళ్లు.. గుజరాత్ రాష్ట్రంలోని సురేంద్ర నగర్ జిల్లాలో నివాసం ఉంటున్నాడు. ఆయన తల వెంట్రుకల పొడవు 62 అడుగులు. అతడు జుట్టు పెంచుకున్న విధం చూస్తే పుట్టినప్పటి నుంచి ఇప్పటి వరకు జుట్టుని కత్తిరించాడో లేదో అనే అనుమానం కలగడం ఖాయం. తన జుట్టును ఏ విధంగా సంరక్షించుకుంటున్నాడో తెలుసా... తాను బయటకు వెళ్లేటప్పుడు తన కేశాలను తాడు చుట్టినట్లుగా చుట్టి చేతికి తగిలించుకుని వెళతానని, ఒక్కోసారి ఈ కేశాలనే తలపాగాగా చుట్టుకుంటానని తెలిపారు.
తన కేశాలు బలంగా ఉండటం కోసం పండ్లు, కూరగాయలు పుష్కలంగా తీసుకుంటానని వెల్లడించాడు. కేశ సంరక్షణ విషయానికొస్తే, రెండు రోజులకొకసారి తలస్నానం చేస్తానని, ఆ కేశాలను ఆరబెట్టేందుకు తన మనవలు సహకరిస్తారని తెలిపారు. ఆహారపదార్థాల విషయాలలో ఆచితూచి వ్యవహరిస్తాడట. రోజుకు మూడు గంటలు తన కేశాలను శుభ్రం చేసుకునేందుకు సమయాన్నికేటాయిస్తాడట.
