పవన్ సరికొత్త రికార్డు.. 23 సీఎంగా జ్యోతిబసు రికార్డును బ్రేక్ చేశారు..

పవన్ సరికొత్త రికార్డు సృష్టించారు. ఇంతకీ ఈ పవన్.. జనసేనాని, పవర్ స్టార్ పవన్ కల్యాణ్ అనుకునేరు.. కానేకాదు.. ఆయన ఎవరంటే సిక్కిం ముఖ్యమంత్రి పవన్ చామ్లింగ్. ఒక రాష్ట్రానికి ఎక్కువ కాలం ముఖ్యమంత్రిగా.. కమ్యూనిస్టు కురువృద్ధుడు జ్యోతిబసు పేరుమీద ఉన్న రికార్డును పవన్ తిరగరాశారు. సిక్కిం సీఎంగా పవన్ చామ్లింగ్ నిన్నటితో 23 ఏళ్ల 4 నెలల 17 రోజుల కాలాన్ని పూర్తి చేసుకున్నారు. 

అంతకుముందు జ్యోతిబసు పేరిట ఈ రికార్డు వుండేది. పవన్ చామ్లింగ్‌ ప్రస్తుతం ఆ రికార్డును చెరిపేయడంతో.. రాజకీయ వర్గాల్లో ఆసక్తికర చర్చ మొదలైంది. చూడటానికి చాలా మెతకగా కనిపించే మనిషైనప్పటికీ.. సవాళ్లను సమర్థవంతంగా పరిష్కరించి.. రాజకీయాల్లో రాణించారు. తద్వారా ఉన్నతస్థాయికి చేరుకున్నారు. 

చామ్లింగ్ కుటుంబంపై అవినీతి ఆరోపణలు ఉన్నా కూడా.. పరిపాలనలో మాత్రం అవేవీ ఆయనపై ప్రభావం చూపించలేకపోయాయి. ఈశాన్య రాష్ట్రాల్లో అత్యంత పరిశుభ్రమైన పర్యాటక రాష్ట్రంగా సిక్కింను పవన్ అభివృద్ధి చేశారు. దీంతో సిక్కిమ్‌ను ''స్విట్జర్లాండ్ ఆఫ్ ఇండియా'' అని పిలిచే స్థాయికి అభివృద్ధి చేశారు.