సభ్య సమాజం తలదించుకునే ఘటన ఒకటి వెస్ట్ బెంగాల్ రాష్ట్రంలో చోటుచేసుకుంది. ఈ రాష్ట్రంలోని జల్పాయ్‌గురి జిల్లా కసియాజోరా అనే గ్రామానికి చెందిన ఓ వ్యక్తి అల్లా చెప్పాడనీ కట్టుకున్న భార్య సమక్షంలోనే కుమార్తెను పెళ్లి చేసుకున్నాడు. పైగా, ఈ దుర్మార్గుడు కుమార్తెను గర్భవతిని కూడా చేశాడు. తాజాగా వెలుగు చూసిన ఈ వివరాలను పరిశీలిస్తే..
ఈ గ్రామానికి చెందిన 36 ఏళ్ల అఫాజుద్దీన్ అనే వ్యక్తి అల్లా ఆదేశించాడంటూ... తన 15 ఏళ్ల కుమార్తెను పెళ్లి చేసుకున్నాడు. ఈ పెళ్లికి ఆయన భార్య సకీనా పూర్తి మద్దతు తెలిపింది. బిడ్డ మంచి కోసమే ఇలా చేస్తున్నానని చెప్పడంతో ఆమె సరేనంది. అయితే, ఈ విషయాన్ని ఆ దుర్మార్గుడు అత్యంత గోప్యంగా ఉంచాడు. గ్రామస్తులకు తెలియకుండా జాగ్రత్తపడ్డాడు. అయితే, బాలిక శరీరంలో మార్పులు రావడాన్ని స్థానికులు గమనించారు.
దీనిపై నిలదీయగా అసలు విషయం బయటపడింది. ఈ విషయం పోలీస్ స్టేషన్ వరకు చేరడంతో అఫాజుద్దీన్‌ను పోలీసులు అరెస్ట్ చేశారు. ఈ సందర్భంగా తన భర్తను సకీనా వెనకేసుకు రావడం గమనార్హం. తన భర్తకు అల్లాపై ఎనలేని భక్తి ఉందని... ఆయన అబద్ధం చెప్పరని ఆమె తెలిపింది. ఈ దారుణంపై అందరూ మండిపడుతున్నారు. కఠిన చర్యలు తీసుకోవాలని డిమాండ్ చేస్తున్నారు. స్థానికంగా ఈ ఘటన కలకలం రేపుతోంది.
