సాధారణంగా చేపల కూర అంటే ఇష్టపడని వారుండరు. ప్రతి ఒక్కరూ తమకు ఇష్టమైన చేపలను తెచ్చుకుని తమకు తోచిన విధంగా వంట చేసుకుని ఆరగిస్తుంటారు. అలాగే, జపనీయులకు కూడా ఓ చేప కూర అంటే అమితమైన ఇష్టం. కానీ, ఆ చేప కూర వండాలంటే మాత్రం నాలుగేళ్ళ పాటు శిక్షణ తీసుకోవాల్సి ఉందట. ఇంతకీ చేప ఏంటో.. శిక్షణ ఎలా ఉంటుందో తెలుసుకుందాం.
జపాన్ దేశంలో లాగొసెఫలస్‌ జాతికి చెందిన పుఫ్పర్‌ ఫిష్‌‌ను ఆ దేశ ప్రజలు ‘ఫుగు’ అనే పిలుస్తారు. దీనిని వారు అమితంగా ఇష్టపడతారు. అయితే, ఈ చేప అత్యంత విషపూరితమైనది. దీని కాలేయం, కళ్లు, ఇతర అవయవాల్లో టెట్రొడొటాక్సిన్‌ అనే విషపదార్థం ఉంటుంది. ఇది సైనైడ్ కన్నా 1200 రెట్లు అధికంగా ప్రభావం చూపుతుంది. ఈ విషం శరీరంలోకి ప్రవేశించిన క్షణాల్లో మనిషి కండరాల కదలిక ఆగిపోయి, ఊపిరి ఆడక చనిపోతారు.
ఇంత ప్రమాదకరమైన ఈ చేపను తినేందుకు జపనీయులు చాలా ఆసక్తి చూపుతారు. దీంతో దీనిని వండేందుకు ప్రత్యేక శిక్షణ పొందిన చెఫ్‌లను నియమించుకుంటారు. ఈ చేపను గుర్తించడం, కోయడం, శుభ్రం చేయడంలో మూడేళ్లు, వండటంలో కనీసం యేడాది... ఇలా మొత్తం నాలుగేళ్ల శిక్షణ పొందాల్సివుంది. ఆ తర్వాత పరీక్ష నిర్వహిస్తారు.
అందులో ఉత్తీర్ణులకు మాత్రమే ఈ చేపను వండేందుకు అనుమతి ఇస్తారు. వారిని మాత్రమే రెస్టారెంట్లు చెఫ్‌లుగా నియమించుకుంటాయి. అనుభవం లేకుండా ఫుగు చేపతో వంటకాలు చేస్తే తినేవారికి ప్రాణాపాయం సంభవించే ప్రమాదం ఉందట. పైగా జపాన్లో ఈ వంటకం చాలా ఖరీదైనది. అందుకే జపాన్లో ఈ చేప వంటకాన్ని తయారు చేసే రెస్టారెంట్లు కూడా చాలా తక్కువేనట.
