మార్గశిర ఏకాదశినే మోక్షదా ఏకాదశిగా పిలుస్తుంటారు. ఇక ఈ రోజున ఏకాదశి వ్రతాన్ని ఆచరించడం ద్వారా పాపాలు హరించుకుపోతాయి. ఈ రోజున ఏకాదశి వ్రతాన్ని చేయాలనుకునే వాళ్లు , ఉదయాన్నే తలస్నానం చేసి పరిశుభ్రమైన వస్త్రాలను ధరించాలి. ఇంటినీ , పూజా మందిరాన్ని పరిశుభ్రపరుచుకోవాలి.
విష్ణుమూర్తి ప్రతిమను లేదా పటాన్ని పంచామృతాలతో అభిషేకించి , షోడశోపచార పూజా విధానాన్ని పూర్తి చేయాలి. ఆ రోజంతా ఉపవాసం ఉండి విష్ణునామ సంకీర్తనతో జాగరణ చేయాలి. మరునాడు ఉదయాన్నే ద్వాదశి రోజున పునఃపూజ చేసి నైవేద్యం సమర్పించడంతో ఏకాదశి వ్రతం పూర్తి చేసినట్టు అవుతుంది. పూర్వం ఈ వ్రతాన్ని వైఖాసనుడనే రాజు ఆచరించి మోక్షాన్ని పొందినట్టుగా పురాణాలు చెబుతున్నాయి.
ఏకాదశి తిథి సూర్యోదయం నుండి ద్వాదశి తిథి సూర్యోదయం వరకు 24 గంటల పాటు ఉపవాసం ఉండాలి. గర్భిణీలు, వృద్ధులు, చిన్నారులు ఈ వ్రతాన్ని ఆచరించాల్సిన అవసరం లేదు.
కఠినమైన ఉపవాసం పాటించలేని వారికి పాలు , పాల ఉత్పత్తులు , పండ్లు మరియు ఇతర శాఖాహార ఆహారాలు తినడం ద్వారా పాక్షిక ఉపవాసం కూడా అనుమతించబడుతుంది. మోక్షదా ఏకాదశి వ్రతాన్ని పాటించని వారికి కూడా బియ్యం , ధాన్యాలు , పప్పుధాన్యాలు, ఉల్లిపాయ, వెల్లుల్లి తినడం నిషేదం.
ఈ రోజున పవిత్ర భగవద్గీతను కూడా పూజిస్తారు. శ్రీకృష్ణుడికి పూజలు చేస్తారు. సాయంత్రం విష్ణు దేవాలయాలను సందర్శిస్తారు. మోక్షాద ఏకాదశి సందర్భంగా 'భగవద్గీత', 'విష్ణు సహస్రనామం', 'ముకుందష్టకం' పఠించడం మంచి ఫలితాలను ఇస్తుందని ఆధ్యాత్మిక పండితులు అంటున్నారు. ఈ రోజునే గీత జయంతిగా పిలుస్తారు.
రోజూ పంచాంగం చదవడం శుభప్రదంగా భావిస్తారు. కొత్త వ్యాపారం చేపడితే విశేష ఫలితాలు లభిస్తాయి. పురాణాలప్రకారం, మోక్షదా ఏకాదశి వ్రతాన్ని ఆచరించడం ద్వారా పితృదేవతలకు మోక్షం సిద్ధిస్తుందని విశ్వాసం. ఈ రోజున భగవద్గీతను కురుక్షేత్ర పురాణ యుద్ధం సమయంలో కృష్ణుడు అర్జునుడికి వివరించాడు.
