కేంద్ర ప్రభుత్వం జారీ చేసే ఆధార్ నంబరును ఇపుడు మరో దానికి లంకె పెట్టనున్నారు. ఇప్పటికే రేషన్ కార్డులకు, విద్యార్హత ధృవీకరణ పత్రాలకు, గ్యాస్ సిలిండర్లకు, పాన్ నంబర్లకు, బ్యాంకు ఖాతాలకు ఇలా ప్రతి దానికి లంకె పెడుతూ వస్తున్నారు.
అయితే, హైదరాబాద్ నగర పోలీసులు మరో అడుగు ముందుకేసి... ఆధార్ నంబరుకు, పబ్‌కు లింకు పెట్టారు. ఈ రెండింటికేంటి లింకేంటి? అనేదే కదా మీ సందేహం. అంటే.. ఇకపై పబ్‌లోకి ఎంట్రీ కావాలంటే ఆధార్ నంబరును తప్పనిసరిగా చూపించాల్సి ఉంటుందన్నమాట.
ఇటీవల తెలుగు ఫిల్మ్ ఇండస్ట్రీని కుదిపేసిన డ్రగ్ రాకెట్ ద్వారా ఈ విషయం బయటపడింది. 21 ఏళ్లు దాటినవాళ్లు మాత్రమే పబ్‌లోకి ఎంటర్ కావాలి. ఐడెంటీ కార్డు అనేది కొత్త రూల్ కాదు అని, ఆధార్ కార్డు తప్పనిసరి అన్నదే కొత్త విషయమని ఎక్సైజ్ సూపరిండెంట్, సిట్ చీఫ్ శ్రీ శ్రీనివాస్ రావు తెలిపారు. నగరంలో ఉన్న 14 పబ్‌లకు ఇప్పటికే సిట్ వార్నింగ్ లేఖలను పంపింది.
