హైదరాబాద్‌లో మరో అమానుష చర్య జరిగింది. తరగతి గది ప్రేమ హద్దులు దాటింది. ఫలితంగా ఓ ఇంటర్ విద్యార్థిని ఆడశిశువుకు జన్మనిచ్చింది. ఈ విషయం బయటకు పొక్కకుండా అధికార పార్టీకి చెందిన ఓ రాజకీయ నేత కుమారుడు రంగంలోకి దిగాడు. కానీ, ఇరుగుపొరుగు వారి చెవిన పడటంతో మీడియా దృష్టికి రావడంతో బహిర్గతమైంది. తాజాగా వెలుగులోకి వచ్చిన ఈ వివరాలను పరిశీలిస్తే...
హైదరాబాద్, అల్వాల్‌లోని వేర్వేరు ప్రాంతాల్లో నివాసం ఉండే 17 సంవత్సరాల యువతి, యువకుడు ఒకే విద్యా సంస్థలో ఇంటర్ ద్వితీయ సంవత్సరం చదువుతున్నారు. వీరిద్దరూ ప్రేమలో పడ్డారు. గత రెండేళ్లుగా వీరిద్దరూ గాఢమైన ప్రేమలో మునిగిపోయారు. ఈ క్రమంలో వారిద్దరి ప్రేమ తరగతి గదిలోనే హద్దులు దాటింది. ఫలితంగా ఆ యువతి ఫిబ్రవరి 14న పురిటి నొప్పులతో గాంధీ ఆసుపత్రిలో చేరింది.
అక్కడ సదరు యువతి ఆడశిశువుకు జన్మనిచ్చింది. దీన్ని గాంధీ ఆసుపత్రి వైద్యులు మెడికో లీగల్‌ కేసుగా పరిగణించి అల్వాల్‌ పోలీసులకు సమాచారం ఇచ్చారు. అయితే ఇక్కడే వివాదం మలుపు తిరిగింది. ఓ రాజకీయ నేత కుమారుడు రంగంలోకి తెరపైకి వచ్చాడు. యువతి తల్లిదండ్రులతో బేరసారాలు, ఒప్పందాలకు కుదుర్చుకుని విషయాన్ని గుట్టుగా దాచేందుకు ప్రయత్నించాడు.
అయితే, యువతి తల్లిదండ్రులు, బంధువులు మాత్రం వివాహం చేసుకోవాలని పట్టుబట్టారు. ఇద్దరు మైనర్లు కావడంతో పెళ్లికి వయస్సు అడ్డువచ్చింది. మైనారిటీ తీరిన తర్వాత తర్వాత పెళ్లి చేయిస్తామని పెద్దలు ఒప్పందం చేయించారు. చిన్నారిని ఓ శిశుసదనంలో చేర్పించారు.
