నిజానికి వెండితెర వెనుక అనేక విషాద సంఘటనలు జరుగుతున్నాయన్నది బహిరంగ రహస్యం. అయితే, ఇవి ఇటీవలి కాలంలో బయటపడుతున్నాయి. తాజాగా హీరోయిన్ అర్చన కూడా ఇదే విషయాన్ని ప్రస్తావించింది. ఓ యూట్యూబ్ ఛానెల్‌కి ఇచ్చిన ఇంటర్వ్యూలో దీన్ని బయటపెట్టింది. తన సినిమాలో ఆమెకి ఛాన్స్ ఇచ్చిన ఓ నటుడు.. షూటింగ్‌ పూర్తయిన తర్వాత.. నీకు అవకాశం ఇచ్చాను.. నాకేమిస్తావ్‌ అని అడిగాడని, ఆ సమయంలో నాకేం చెప్పాలో తెలియలేదంటూ కంటతడి పెట్టింది.
వెంటనే.. మీకు ఇచ్చేంతదాన్ని కాదని చెప్పి అక్కడి నుంచి వెళ్లిపోయానని, ఆ సినిమాలో తన రోల్‌ని చాలావరకు కట్‌ చేశారని మనసులోని వేదనను బయటపెట్టింది. ఇక అవార్డుల ఫంక్షన్‌లో ఓ అవార్డు ఇవ్వడానికి ఓ నటుడితో కలిసి వేదిక మీదకు తాను వెళ్లాలని నిర్వాహకులు చెప్పారని, చివరి నిమిషంలో ఆ హీరో తనతో కలిసి వేదిక మీదకు రావడానికి ఇష్టపడలేదని చెప్పుకొచ్చింది. ఈ క్రమంలో హీరోకి తోడుగా మరో హీరోయిన్‌ను పంపించారని తెలిపింది అర్చన. ఇంతకీ ఆ హీరో ఎవరంటూ సోషల్ మీడియాలో చర్చించుకుంటున్నారు.
అయితే, ఇపుడు అర్చన చేసిన ఆరోపణలపై చర్చ సాగుతోంది. ఆమె అవకాశాలు లేక కష్టాల్లో ఉన్నపుడు... సినీ ఛాన్సులిప్పించిన హీరో ఎవరు.. అలాగే, అవార్డుల ఫంక్షన్‌లో ఆమెతో వేదిక పంచుకునేందుకు నిరాకరించిన నటుడు ఎవరన్న అంశంపై ఇపుడు సినీ ప్రముఖులు ఆరా తీస్తున్నారు.
