హైదరాబాద్‌లో వెలుగుచూసిన డ్రగ్స్ దందాలో సంబంధం ఉన్నట్టు ఆరోపణలు ఎదుర్కొంటున్న సినీ ప్రముఖుల వద్ద బుధవారం నుంచి విచారణ ప్రారంభంకానుంది. ఈ నేపథ్యంలో డ్రగ్స్ కేసులో వారి ప్రమేయంపై వేయాల్సిన ప్రశ్నలను సిట్ బృందం తయారు చేస్తోంది. డ్రగ్స్ నిందితుడి వద్దకు వారి ఫోన్‌నంబర్ ఎలా వచ్చింది? ఎన్నిసార్లు ఫోన్లో మాట్లాడారు? ఎప్పుడెప్పుడు మాట్లాడారు?
ఒక అజ్ఞాత వ్యక్తితో అన్నిసార్లు మాట్లాడాల్సిన పనేంటి? డ్రగ్స్ కొన్నారా? వేరే వారితో తెప్పించుకున్నారా? అనే అంశాలపై సిట్ ఆరా తీయనున్నట్లు తెలిసింది. అలాగే ఫోన్లో మాట్లాడిన గొంతు ఎవరిదనే విషయాన్ని కూడా అవసరాన్ని బట్టి పరిశీలించే అవకాశం ఉంది. విచారణ సందర్భంగా నోటీసులు అందుకున్న ప్రముఖులు చెప్పే ప్రతీ అంశాన్ని వీడియో రికార్డు చేసి కేసు భవిష్యత్ పురోగతికి ఉపయోగించుకునే అవకాశముంది.
అయితే, ఈ స్కామ్‌లో ఆరోపణలు ఎదుర్కొంటూ నోటీసులు అందుకున్న ప్రముఖుల్లో కొందరు సిట్ అధికారులతో ఫోన్ ద్వారా టచ్‌లో ఉన్నట్లు సమాచారం. పలువురు ఆర్టిస్టులు నోటీసుల్లో పంపిన తేదీల్లో విచారణకు హాజరుకావడం కుదురదని, తమకు అసలు డ్రగ్స్ కేసుతో ఎలాంటి సంబంధం లేదని ఇప్పటికే వివరణ ఇచ్చుకున్నట్టు తెలుస్తోంది.
కానీ, అధికారులు మాత్రం విచారణ సమయంలోనే అంతా చెప్పుకోవాలని సూచిస్తున్నట్లు సమాచారం. నిర్ధారిత తేదీల్లో విచారణకు రావడం కుదురడంలేదని, మరో తేదీకి అవకాశం కల్పించాలని కొందరు కోరుతున్న నేపథ్యంలో వారు విచారణకు వచ్చే అవకాశాలు తక్కువగా ఉన్నట్లు తెలుస్తున్నది.
