ఇకపోతే ఆంధ్రప్రదేశ్ రాష్ట్రానికి వస్తే ఇప్పటికే కొంతమంది పేర్లు అమిత్ షా జాబితాలో చేరిపోయాయట. అందులో కలెక్షన్ కింగ్ కుమార్తె మంచు లక్ష్మీప్రసన్న ఒకరంటున్నారు. ఈమె సామాజిక సేవ గురించి విడమర్చి చెప్పక్కర్లేదు. ఇప్పటికే బుల్లితెర హోస్టెస్‌గా పలు కార్యక్రమాలు నిర్వహిస్తున్నారు. సమస్యలపై ఎలుగెత్తి మాట్లాడటంలో మంచు లక్ష్మి ముందుంటారు.
ఈ నేపధ్యంలో మంచు లక్ష్మిని తమ పార్టీ నుంచి పోటీ చేయించాలని అమిత్ షా భావిస్తున్నారట. ఆమెకు చిత్తూరు జిల్లా సీటును ఇచ్చి అక్కడి నుంచి పోటీకి దింపాలని అనుకుంటున్నట్లు సమాచారం. దీన్నిబట్టి తెలుగుదేశం పార్టీతో భాజపా కటీఫ్ చేసుకుంటుందని అనుకోవచ్చు. ఇప్పటికే వైసీపి నుంచి వచ్చిన ఎమ్మెల్యేలకు మంత్రి పదవులను కట్టబెట్టడంపై భాజపా నాయకురాలు పురంధేశ్వరితో పాటు ఎమ్మెల్యే విష్ణుకుమార్ రాజు ముఖ్యమంత్రి చంద్రబాబును విమర్శించిన సంగతి తెలిసిందే. మొత్తమ్మీద చూస్తే భాజపా అభ్యర్థుల ఎంపికలో చాలా చాలా ముందుచూపులో వున్నట్లు అర్థమవుతుంది.
