టాలీవుడ్ ప్రేమ పక్షులు నాగ చైతన్య- సమంత అక్టోబర్ 6న వివాహం చేసుకోనున్న సంగతి తెలిసిందే. చైతూ యుద్ధం శరణం సినిమాతో బిజీగా ఉండగా, సమంత అటు తమిళం ఇటు తెలుగు సినిమాల షూటింగ్‌లతో క్షణం తీరిక లేకుండా గడుపుతోంది. కొద్దిగా టైం దొరికిన ఇరువురు పెళ్లి షాపింగ్‌తో బిజీ అవుతున్నార‌ని సినీ నటి.. అక్కినేని నాగార్జున సతీమణి అమల చెప్పారు.
ఇద్దరూ సినిమా నటులే కావటం వలన పెళ్లి వార్తల పట్ల అందరూ ఆసక్తి చూపిస్తున్నారని అమల అన్నారు. పెళ్లి నిరాడంబరంగా కుటుంబ సభ్యుల మధ్యన జరపాలని నిశ్చయించామని చెప్పారు. సమంత , చైతన్య ముచ్చటైన జంట అని, వారు పెళ్లి షాపింగ్, ఏర్పాట్ల బిజీలోఉన్నారని అమల అక్కినేని వెల్లడించారు.
ఇదిలా ఉంటే.. వినాయక చవితి రోజున తిరుమలకు శుక్రవారం వీఐపీలు పోటెత్తారు. సినీ నటి సమంత, క్రికెటర్ దినేశ్‌ కార్తీక్, మంత్రి పరిటాల సునీతతో పాటు పలువురు ప్రముఖులు శ్రీవారిని దర్శించుకున్నారు. వీఐపీ విరామ దర్శనాల సమయంలో స్వామివారి సేవలో తరించారు. అనంతరం వేద పండితులు ఆశీర్వదించి వారందరికీ తీర్థప్రసాదాలను అందజేశారు.
