బాలీవుడ్ స్టార్ హీరో సల్మాన్ ఖాన్‌కు గుర్తు తెలియని వ్యక్తులు బెదిరింపు లేఖ రాశారు. పంజాబ్ గాయకుడు సిద్ధూకు పట్టిన గతే నీకూ, నీ తండ్రికి పడుతుందంటూ అందులో హెచ్చరించారు. దీంతో సల్మాన్ ఖాన్‌తో పాటు.. ఆయన ఇంటి పరిసరాల వద్ద భద్రతను పెంచారు.
ఇటీవల పంజాబ్ గాయకుడు సిద్ధూను కొందరు దండగులు అత్యంత క్రూరంగా కాల్చి చంపేసిన విషయం తెల్సిందే. అయితే, సిద్ధూ మూసేవాలాను చంపినట్టే సల్మాన్ ఖాన్‌ను చంపుతాంటూ ఈ బెదిరింపు లేఖలో పేర్కొన్నారు. ముఖ్యంగా, సల్మాన్ ఖాన్ తండ్రి సలీం ఖాన్‌ను కూడా చంపేస్తామంటూ ఆ లేఖలో హెచ్చరించారు.
దీంతో ఈ లేఖను సీరియస్‌గా తీసుకున్న సల్మాన్ ఖాన్ ముంబై పోలీసులకు ఫిర్యాదు చేశారు. దీంతో వారు కేసు నమోదు చేసి గట్టి భద్రతను కల్పించారు. కాగా గతంలో సల్మాన్ ఖాన్‌పై కృష్ణ జింకలను వేటాడిన కేసు నమోదైవున్న విషయం తెల్సిందే. ఈ కేసులో సల్మాన్‌కు వ్యతిరేకంగా బిష్ణోయ్ తెగ ప్రతినిధులు కోర్టును ఆశ్రయించారు. దీంతో ఈ కేసులో ఆయన ముద్దాయిగా కూడా తేలారు.
