బాలికా విద్య కోసం పాటుప‌డుతూ నోబెల్ బ‌హుమ‌తి గెల్చుకున్న మలాలా యూసుఫ్ జాయ్‌ని గ్లోబల్ స్టార్ ప్రియాంక చోప్రా కలిసింది. యునిసెఫ్ గుడ్‌విల్ అంబాసిడ‌ర్‌గా బాలిక‌ల విద్య కోసం ప్రియాంక చోప్రా కృషి చేస్తోంది. ఇందులో భాగంగా ఇటీవ‌ల న్యూయార్క్‌లో జ‌రిగిన యునిసెఫ్ స‌మావేశంలో ప్రియాంక చోప్రా పాల్గొంది. ఈ సందర్భంగా మలాలాతో ఆమె భేటీ అయ్యింది.
వీరిద్దరూ కలవడం ఇదే తొలిసారి కావడంతో ట్విట్ట‌ర్ వేదిక‌గా త‌మ అనుభూతుల‌ను పంచుకున్నారు. ప్రియాంక చోప్రాను క‌లిసిన విషయాన్ని తాను నమ్మలేకపోతున్నానని మలాలా ట్వీట్ చేసింది. నన్ను కలవడం కాదు.. నేను నిన్ను కలిశానంటే అది కూడా నమ్మశక్యం కాలేదని ప్రియాంక చోప్రా వెల్లడించింది. చిరు ప్రాయంలో పెద్ద హృదయం, గొప్ప ఘనతలు సాధించిన మలాలాను చూస్తే ఎంతో గర్వంగా వుందంటూ ప్రియాంక చోప్రా ట్వీట్ చేసింది.
