పవర్ స్టార్ పవన్ కళ్యాణ్ కోసం తాను ఏమైనా చేయడానికి సిద్ధంగా ఉన్నట్టు 'నచ్చావులే' హీరోయిన్ మాధవీలత చెప్పుకొచ్చారు. పైగా, తాను జనసేన పార్టీకి సంపూర్ణ మద్దతు ప్రకటిస్తున్నట్టు తెలిపారు. 'నచ్చావులే' చిత్రంతో తెరంగేట్రం చేసి మంచి పాపులారిటీ సంపాదించుకున్న అచ్ఛ తెలుగమ్మాయి మాధవీలత. ఈ చిత్రం తర్వాత ఆమె పెద్దగా అవకాశాలు లేకపోవడంతో తెరమరుగైంది.
ఆ తర్వాత తెలుగు సినీ ప‌రిశ్ర‌మ‌లోని హీరోయిన్ల‌కు ఎదుర‌య్యే లైంగిక వేధింపుల గురించి ధైర్యంగా వెల్ల‌డించి అంద‌ర్నీ ఆశ్చ‌ర్య‌ప‌రిచింది. తాజాగా ఈ భామ ప‌వ‌ర్‌స్టార్ పవన్ కల్యాణ్ గురించి సోష‌ల్ మీడియాలో పెట్టిన పోస్ట్ వైర‌ల్‌గా మారింది. అవ‌కాశం ఇస్తే పవన్ స్థాపించిన 'జనసేన' ద్వారా ప్ర‌జాసేవ చేయాల‌నుకుంటున్న‌ట్టు మాధ‌వి వెల్ల‌డించింది.
'ప‌వ‌ర్‌స్టార్ పవన్ కల్యాణ్ అంటే నాకెంత ఇష్ట‌మో ప‌దేళ్ల నుంచీ చెబుతూనే ఉన్నా. ప‌వ‌న్‌లాగానే నాకూ ప్ర‌జా సేవ అంటే ఎంతో ఇష్టం. ఓ వ్య‌క్తిగా పవన్ కల్యాణ్ 'జనసేన' స్థాపించిన‌ప్పుడు నేనెందుకు మ‌ద్ద‌తివ్వ‌కూడదు. పవన్ కోసం ఏమి చేసేందుకైనా నేను సిద్ధ‌మేన' అని ఆమె తన ఫేస్‌బుక్ ఖాతాలో ఓ పోస్ట్ పెట్టింది.
