తన పదేళ్ల ప్రయాణం ఎన్నో మధురానుభూతులను మిగిల్చింది. ఇన్నేళ్ల పాటు విభిన్న పాత్రలతో ప్రేక్షకుల్ని అలరించే అవకాశం దక్కడం ఆనందంగా ఉంది. కొన్ని సినిమాలు పాత్రలు నచ్చి చేస్తాం. కొన్ని ప్రేక్షకుల కోసం చేస్తాం. కానీ ఈ సినిమాను చిరంజీవి కోసమే చేశాను. గొప్ప నటుడితో తెరను పంచుకునే అవకాశం రావడం అదృష్టంగా భావిస్తున్నాను. పదేళ్ల తర్వాత సినిమాల్లో పునరాగమనం చేసినా నటన పట్ల ఆయనకు ఉన్న తపన, డ్యాన్సుల్లో జోరు ఏదీ తగ్గలేదు. ఇప్పటివరకూ నేను పనిచేసిన హీరోల్లో బెస్ట్ పర్సన్ ఆయనే.
మెగా ఫ్యామిలీలో నేను పనిచేసిన హీరోల్లో ఎవరూ బెస్ట్ అంటే చెప్పడం కష్టమే. కానీ వారందరిలో చిరంజీవి నా అభిమాననటుడు. ఈ సినిమాలో నటన, డ్యాన్సుల పరంగా ఆయన నుంచి చాలా నేర్చుకునే అవకాశం దొరికింది. ఆయనతో పోటీపడి డ్యాన్సులు చేయడం చాలా కష్టమైంది. పాటల చిత్రీకరణ సమయంలో చాలా టేక్‌లు తీసుకున్నాను. అమ్మడు లెట్స్ కుమ్ముడు పాటలో చిరంజీవి, చరణ్ ఇద్దరితో కలిసి డ్యాన్స్ చేయడం నా జీవితంలో ఎప్పటికీ మర్చిపోలేని జ్ఞాపకంగా మిగిలింది. నా వరకు అదే నాకు కజ్‌రారే పాట అయింది అని చెప్పుకొచ్చింది.
