'లక్ష్మీస్ వీరగ్రంథం' సినిమా షూటింగ్‌కు ఆదిలోనే దెబ్బతగిలింది. ఎన్టీఆర్ స్వగ్రామం నిమ్మకూరులో సన్నివేశాల చిత్రీకరణకు ప్రయత్నించిన యూనిట్‌కు గ్రామ పంచాయతీ చుక్కలు చూపించింది. లక్ష్మీస్ వీరగ్రంథం సినిమాకు అడ్డంకులు తప్పడం లేదు. ఈ సినిమా ముహూర్తం సన్నివేశాన్ని హైదరాబాదులోని ఎన్టీఆర్ ఘాట్ వద్ద చిత్రీకరించేందుకు ఇటీవల చిత్ర బృందం ప్రయత్నించింది. అయితే, దీనిని పోలీసులు అడ్డుకున్న సంగతి తెలిసిందే.
అనంతరం ఈ చిత్రయూనిట్ ఎన్టీఆర్ స్వస్థలమైన కృష్ణా జిల్లా పామర్రు మండలంలోని నిమ్మకూరులో జరిపేందుకు చేసిన ప్రయత్నాలను ఆ గ్రామవాసులు అడ్డుకున్నారు. ఎన్టీఆర్‌కు సంబంధించిన కొన్ని సన్నివేశాలు చిత్రీకరించేందుకు పంచాయతీ పెద్దలను ఈ సినిమా దర్శకుడు కేతిరెడ్డి జగదీశ్వర్ రెడ్డి ఆశ్రయించారు. సన్నివేశాల చిత్రీకరణకు అనుమతి ఇవ్వాలని కోరారు. దీంతో సమావేశమైన పంచాయతీ పాలకవర్గం, గ్రామపెద్దలు చిత్రీకరణకు అభ్యంతరం తెలిపారు.
