మీటూ ఉద్యమంలో భాగంగా, కన్నడ నటి శృతిహరిహరన్ చేసిన లైంగిక వేధింపుల కేసులో హీరో అర్జున్‌కు చుక్కెదురైంది. శృతి హరిహరన్‌పై అర్జున్ పెట్టిన కేసులో నమోదు చేసిన ఎఫ్ఐఆర్‌ను రద్దు చేయాలని పోలీసులను కర్నాటక హైకోర్టు ఆదేశించింది. ఈ విషయంలో శృతి హరిహరన్ పైచేయి సాధించినట్టయింది.
ఉద్దేశపూర్వకంగానే తనపై శృతి హరిహరన్ లైంగిక వేధింపుల ఆరోపణలు చేసిందని అర్జున్ ఆరోపించాడు. పైగా, వీరిద్దరి మధ్య రాజీ కుదిర్చేందుకు కన్నడ చిత్ర పరిశ్రమకు చెందిన పెద్దలు శతవిధాలా ప్రయత్నించారు. కానీ, ఇవి ఫలించలేదు.
ఈ నేపథ్యంలో తనను కావాలనే మీటూ వ్యవహారంలోకి లాగిందని ఆరోపిస్తూ శృతి హరిహరన్‌పై అర్జున్ పరువు నష్టం కేసు పెట్టాడు. దీంతో ఆమెపై ఎఫ్.ఐ.ఆర్ కూడా నమోదైంది. ఈ వ్యవహారంపై వాదనలు ఆలకించిన కోర్టు.. శృతి హరిహరన్‌కు అనుకూలంగా తీర్పు ఇచ్చింది. ఆమెపై నమోదు చేసిన ఎఫ్.ఐ.ఆర్‌ను రద్దు చేయాలని ఆదేశించింది. దీంతో అర్జున్‌పై శృతి పైచేయి సాధించినట్టు అయింది.
