దర్శకేంద్రుడు కె రాఘవేంద్ర రావు దర్శకత్వంలో అక్కినేని నాగార్జున హీరోగా తెరకెక్కుతున్న చిత్రం 'ఓం నమోవెంకటేశాయ'. ప్రస్తుతం ఈ చిత్ర షూటింగ్ శరవేగంగా సాగుతోంది. ప్రస్తుతం ఈ సినిమా షూటింగ్ మహాబలేశ్వరంలోని కొండల్లో జరగుతోంది.
ఈ సందర్భంగా షూటింగ్ సమయంలో తీసిన ఓ వీడియో క్లిప్ ను తన ట్విట్టర్ లో పోస్ట్ చేసిన నాగార్జున 'మహాబలేశ్వరంలో మబ్బుల్లో నడుస్తున్నట్టు, ప్రపంచపు అంచున ఉన్నట్టుగా అనిపిస్తోంది' అంటూ కామెంట్ చేశాడు.
శుక్రవారం కువైట్ నుంచి తిరిగి వచ్చిన నాగ్, వెంటనే ఓం నమోవేంకటేశాయ షూటింగ్ కోసం మహాబలేశ్వరం వెళ్లారు. మహేష్ రెడ్డి నిర్మాణంలో తెరకెక్కుతున్న ఈ సినిమా 2017 ప్రథమార్థంలో ప్రేక్షకుల మందుకు రానుంది.
కాగా, గతంలో వీరి కాంబినేషన్‌లో వచ్చిన 'అన్నమయ్య', 'శ్రీ రామదాసు', 'శిర్డీసాయి'లాంటి భక్తిరస చిత్రాలు ఘనవిజయం సాధించటంతో ఈ సినిమాపై కూడా భారీ అంచనాలు ఉన్నాయి.
