బాలీవుడ్ యువ హీరో సుశాంత్ సింగ్ రాజ్‌పుత్ ఆత్మహత్య చేసుకోగా, ఈ విషాదకర ఘటన ఇండియన్ మూవీ ఇండస్ట్రీలో ఓ సంచలనంగా మారింది. ఈ క్రమంలో సుశాంత్‌తో ప్రేమ ఉందంటూ బాలీవుడ్ నటి రియా చక్రవర్తి పేరు మార్మోగిపోయింది. పైగా వీరిద్దరూ పెళ్లి చేసుకోవడానికి సిద్ధమయ్యారనే ప్రచారం కూడా జోరుగా సాగింది. ఈ క్రమంలోనే సుశాంత్ ఆత్మహత్య చేసుకున్నాడు.
'నాలో చెలరేగుతున్న భావోద్వేగాలకు సమాధానం చెప్పేందుకు ఇప్పటికీ తడబడుతూనే ఉన్నా. మరమ్మతులు చేయడానికి వీల్లేని విధంగా నా హృదయం మొద్దుబారిపోయింది. నాకు ప్రేమ పట్ల నమ్మకం కలిగించింది.. దాని శక్తి ఏమిటో తెలిపింది నువ్వే. ఓ చిన్న గణిత సమీకరణంతో జీవిత పరమార్థాన్ని ఎలా విడమర్చవచ్చో నేర్పింది నువ్వే. ఈ పాఠాలను నీ నుంచి రోజూ నేర్చుకుంటానని నీకు ప్రామిస్ చేశాను. నువ్విక్కడ లేనప్పుడు నేనెప్పటికీ నేర్చుకోలేను.
నాకు తెలుసు, ఇప్పుడు నువ్వు అత్యంత ప్రశాంతమైన ప్రదేశంలో ఉన్నావు. నీకు ఆ చంద్రుడు, తారలు, పాలపుంతలు స్వాగతం పలికి ఉంటాయేమో! అత్యంత గొప్ప భౌతికవేత్తకు స్వాగతం అంటూ చేతులు చాచి పిలిచుంటాయేమో! పరవళ్లు తొక్కే ఆనందం, సహానుభూతితో ఓ గొప్ప తారగా వెలిగిపోవాల్సిన వాడివి. కానీ అందనంత దూరాలకు వెళ్లిపోయావు. నిన్ను నా వద్దకు తిరిగి తీసుకురావాలని కోరుకుంటున్నాను.
ఈ ప్రపంచం నమ్మలేనంత సుందరుడివి నువ్వేనని అనుకునేదాన్ని. మన మధ్య చిగురించిన ప్రేమను వెల్లడించడానికి మాటలు చాలడంలేదు. నువ్వు చెబుతుండేవాడివి... అది మనిద్దరినీ మించినదని. దానర్థం ఇప్పుడు తెలుసుకోగలుగుతున్నాను. ప్రతి విషయాన్ని విశాల హృదయంతో చూసేవాడివి. ఇప్పుడు మన ప్రేమ కూడా ఎంతో ప్రత్యేకమైనదని చూపావు. నీ ఆత్మకు శాంతి కలగాలని కోరుకుంటున్నాను సుషీ. ఈ 30 రోజుల ఎడబాటు బహుశా జీవితకాలపు ప్రేమ అవుతుందేమో. నిత్యం నీ జ్ఞాపకాలతో ఎప్పటికీ నీ దాన్నే!... కడవరకు, ఆ తర్వాత కూడా!" అంటూ ఎంతో భావుకతతో స్పందించింది. ప్రస్తుతం రియా చక్రవర్తి లేఖ సోషల్ మీడియాలో వైరల్‌గా మారింది.
