చిరు - పవన్‌లు కత్తులు దూసుకోవాలి.. విడిపోవాలని కోరుకుంటున్నారు : తమ్మారెడ్డి విమర్శ

మెగాస్టార్ చిరంజీవి 150వ చిత్రం 'ఖైదీ నంబర్ 150' ప్రీరిలీజ్ ఫంక్షన్ శనివారం గుంటూరు వేదికగా హాయ్‌ల్యాండ్‌లో జరుగనుంది. అయితే, ఈ ఫంక్షన్‌కు పవన్ కల్యాణ్ వస్తారా? రారా? అనే విషయంపై సర్వత్రా ఉత్కంఠ నెలకొంది. పవన్ రావడం లేదంటూ నిర్మాత అల్లు అరవింద్ ఇప్పటికే ప్రకటించారు. మరోవైపు తన వదిన, చిరంజీవి సతీమణి సురేఖ పవన్‌ను ఆహ్వానించేందుకు స్వయంగా వెళుతున్నారనే వార్తలు కూడా వెలువడ్డాయి. ఈ క్రమంలో, సోషల్ మీడియాలో పలురకాలైన కామెంట్స్ పోస్ట్ చేస్తున్నారు. 

వీటిపై దర్శకనిర్మాత తమ్మారెడ్డి భరద్వాజ్ 'నా ఆలోచనలు' పేరిట యూట్యూబ్‌లో ఆయన ఓ వీడియోను అప్ లోడ్ చేశారు. చిరంజీవి, పవన్ కల్యాణ్‌ల భావజాలాలు వేర్వేరుగా ఉన్నంత మాత్రాన వారిద్దరూ విడిపోవాలి, కత్తులు దూసుకోవాలి అనే రీతిలో సోషల్ మీడియాలో కామెంట్ చేస్తున్నారంటూ తమ్మారెడ్డి ఆవేదన వ్యక్తం చేశారు. 

ఇలాంటి పోస్టుల్, కామెంట్స్ చేస్తున్న వారు... చిరంజీవి లేకపోతే పవన్ లేడనే విషయాన్ని గుర్తించాలని... 'ఖుషి' సినిమా హిట్ అయిన తర్వాత పవన్ గురించి చిరంజీవి చాలా గొప్పగా చెప్పుకున్నారన్నారు. 'డాడీ' సినిమాలో పవన్ కంపోజ్ చేసిన ఫైట్‌ను వాడుకున్నారని చెప్పారు. అన్న చిరంజీవి అంటే పవన్‌కు ఎంతో ఇష్టమని తెలిపారు. 

రాజకీయపరంగా కొన్ని అభిప్రాయభేదాలు ఉన్నంత మాత్రాన వారిద్దరి మధ్య ఏదో జరుగుతోందని అనడం ఎంతవరకు సబబని ప్రశ్నించారు. వారిద్దరూ విడిపోతేనే బాగుంటుందనేది నెటిజన్ల అభిప్రాయంలా ఉందని అన్నారు. వీలైతే కలిపే ప్రయత్నం చేయాలి కానీ... విడగొట్టే పని మాత్రం చేయొద్దని నెటిజన్లకు హితవు పలికారు.