బాహుబలిలో ప్రభాస్‌కు పెంపుడు తండ్రిగా, గరుడవేగలో సీఎం పీఏ నటించిన ఐమ్యాక్స్ థియేటర్ మేనేజర్, సినీ నటుడు వెంకట ప్రసాద్ (ఐమ్యాక్స్ వెంకట్) అరెస్టయ్యాడు. యువతిని ప్రేమ పేరుతో మోసం చేసిన కేసులో అతనిని పోలీసులు అదుపులోకి తీసుకున్నారు. వివరాల్లోకి వెళితే.. హైదరాబాదు, బంజారాహిల్స్ రోడ్డు నెంబర్ పదిలో నివాసముండే ఓ మహిళ (33) ప్రసాద్ ఐమ్యాక్స్‌లో పనిచేస్తోంది.
పది సంవత్సరాల క్రితం భర్త నుంచి విడిపోయిన ఆమె.. విడాకుల కోసం ఆమె దాఖలు చేసిన కేసు కోర్టులోనడుస్తోంది. ఆ మహిళపై కన్నేసిన వెంకటప్రసాద్ ప్రేమిస్తున్నానని నమ్మబలికి.. విడాకులు రాగానే పెళ్లి చేసుకుంటానన్నాడు. దీంతో గత ఏడేళ్లుగా వారిద్దరూ సహజీవనం చేస్తున్నారు. ఈ క్రమంలో ఆమె రెండు సార్లు గర్భం దాల్చగా పెళ్లి చేసుకునే వరకు పిల్లలు వద్దంటూ గర్భస్రావం చేయించాడు.
ఈ క్రమంలో ప్రసాద్ సినిమాల్లో నటించే అవకాశాలు సొంతం చేసుకున్నాడు. ఇంతలో బాధిత మహిళకు కోర్టు విడాకులు మంజూరు చేసింది. వెంకట ప్రసాద్‌ను వివాహం చేసుకోవాలని మహిళ ఒత్తిడి తేవడంతో ముఖం చాటేశాడు. అంతేగాకుండా వేరొక యువతితో చెట్టాపట్టాలేసుకుని తిరిగాడు. దీంతో బాధితురాలు బంజారాహిల్స్ పోలీస్ స్టేషన్‌లో ఫిర్యాదు చేసింది. దర్యాప్తులో అతడు అనేకమంది యువతులను ప్రేమ పేరిట మోసం చేసినట్లు తేలింది. దీంతో 420, 506,509, 354(డి) కింద కేసులు నమోదు చేసి వెంకట్‌ను అరెస్టు చేశారు.
