పవర్ స్టార్ పవన్ కళ్యాణ్ నటించిన చిత్రం "వకీల్ సాబ్". ఈ నెల 9వ తేదీన ప్రేక్షకుల ముందుకురానుంది. అయితే, ఈ చిత్రం ప్రీ రిలీజ్ వేడుకను భారీ ఎత్తున నిర్వహించాలని చిత్ర నిర్మాతలు ప్లాన్ చేశారు. కానీ, కరోనా వైరస్ మహమ్మారి కారణంగా ఈ వేడుకకు తెలంగాణ పోలీసులు అనుమతి ఇవ్వలేదు.
ఈ నేపథ్యంలో ఆదివారం ఈ సినిమా ప్రీ రిలీజ్ ఈవెంట్ నిర్వహిస్తున్నారు. రేపు సాయంత్రం 6 గంటలకు హైదరాబాదు శిల్ప కళావేదికలో ఈ ఫంక్షన్ జరుగనుంది. కరోనా నేపథ్యంలో పరిమిత సంఖ్యలోనే ఈ కార్యక్రమానికి అనుమతి ఇస్తున్నట్టు ఈవెంట్ నిర్వాహకులు వెల్లడించారు. ఫ్యాన్స్ పాసులతో రావాలని, మాస్కు లేకపోతే ప్రవేశం నిషిద్ధం అని స్పష్టం చేశారు.
మరోవైపు, బాలీవుడ్ చిత్రం పింక్ మూవీని తెలుగులో మార్పులుచేర్పులతో "వకీల్ సాబ్" పేరిట తెరకెక్కించిన సంగతి తెలిసిందే. పవన్ సరసన శ్రుతిహాసన్ నటించగా, అంజలి, నివేదా థామస్, అనన్య నాగళ్ల కీలకపాత్రలు పోషించారు. ఈ చిత్రానికి వేణు శ్రీరామ్ దర్శకత్వం వహించారు.
