సాధారణంగా వర్షాకాలం వచ్చేసిందంటే.. వాతావరణంలో అనేక మార్పులు చోటు చేసుకుంటాయి. అలాగే, మనం తీసుకునే తిండిలోనూ మార్పులు వస్తుంటాయి. తేమ వాసన పెరిగే కొద్దీ వేడివేడిగా ఏమైనా లాగిస్తే బాగుంటుందని అనిపిస్తుంది. అందుకే వెచ్చవెచ్చగా, ఆరోగ్యకరంగా ఉండే సూప్‌లను ఆరగిస్తే చాలా మంచిదని ఆరోగ్య నిపుణులు చెపుతున్నారు. ఇపుడు టొమాటో తులసి ఆకులతో సూప్ ఎలా తయారు చేస్తారో తెలుసుకుందాం.
తయారీకి కావలసినవి : మూడు టేబుల్ స్పూన్లు తులసి ఆకులు, బాగా పండిన టమోటాలు నాలుగు, ఒక క్యారెట్, ఓ చిన్న దాల్చిన చెక్క, అర టీ స్పూన్ మిరియాల పొడి, నీళ్ళు నాలుగు గ్లాసులు, సరిపడినంత ఉప్పు కావాల్సి ఉంటుంది.
తయారీ విధానం : ముందుగా టొమాటో, క్యారెట్, దాల్చిన చెక్కల్ని ఒక గిన్నెలో వేసుకోవాలి. ఇందులో నీళ్లు పోసి ఉప్పు వేసి కుక్కర్‌లో రెండు విజిల్స్ వచ్చే వరకు ఉడికించాలి. ఈ మిశ్రమం చల్లారాక బ్లెండ్ చేసి వడపోయాలి.
వడకట్టిన ద్రవంలో తులసి, మిరియాలు వేసి సన్నటి మంట మీద కాసేపు ఉడికించాలి. ఆ తర్వాత సర్వింగ్ గిన్నెలోకి సూప్ తీసుకుని పైన మీగడ వేసి తులసాకులతో అలంకరించి తాగితే గొంతుకి హాయిగా ఉంటుంది. జలుబుని కూడా వదులుస్తుంది.
