బంగాళాఖాతంలో ఏర్పడిన అల్పపీడన ద్రోణి, వాయుగుండం ప్రభావం కారణంగా తమిళనాడు రాష్ట్రంలోని 16 జిల్లాలకు వర్ష హెచ్చరికలు చేశారు. అలాగే, చెన్నై, కాంచీపురం, తిరువళ్లూరు, చెంగల్పట్టు జిల్లాలతో పాటు ఏపీలోని నెల్లూరు జిల్లాకు అతి భారీ వర్షం హెచ్చరిక చేశారు.
వాయుగుండం ప్రభావం కారణంగా చెన్నై నగరంలో ఆకాశమంతా మేఘావృతమై నల్లగా ఉంది. ఆగ్నేయ బంగాళాఖాతంలో ఉపరితల ఆవర్తనం కారణంగా.. అల్పపీడనం ఏర్పడింది. రేపు ఉదయానికల్లా ఇది తమిళనాడు వైపు వచ్చే అవకాశాలే ఎక్కువగా ఉన్నాయి. దీని ప్రభావంతో రాష్ట్ర వ్యాప్తంగా మూడు రోజుల పాటు అతి భారీ వర్షాలు కురుస్తాయని చెన్నై వాతావరణ కేంద్రం హెచ్చరించింది. ముఖ్యంగా చెన్నై నగంరలో 20 సెంటీ మీటర్ల వర్షపాతం నమోదయ్యే అవకాశాలు ఉన్నాయి.
ఇటు నెల్లూరుతో పాటు గ్రేటర్ రాయలసీమకు ఇదే హెచ్చరికలు వినిపిస్తున్నాయి. నెల్లూరు, ప్రకాశం, కడప, చిత్తూరు జిల్లాల్లో అతి భారీ వర్షాలు కురవబోతున్నాయి. ప్రభావిత ప్రాంతాల్లో సహాయక చర్యలు కొనసాగుతూనే ఉన్నాయి. ఇలాంటి పరిస్థితుల్లో ఇంకో రెండు రోజుల పాటు పలు జిల్లాలకు రెడ్ అలెర్ట్ ప్రకటించడం ఆందోళన కలిగిస్తోంది.
