ఏ ఉత్పత్తి అయినా తన దేశ అవసరాలకే కాకుండా ప్రపంచదేశాల అవసరాలను కూడా తీర్చగలిగే ఘనత చైనా సొంతం. కానీ ఇప్పుడు ఆ చైనాకు కూడా ఓ వస్తువు విషయంలో తీవ్రమైన కొరత ఏర్పడింది. అదే గాడిద చర్మం. స్వదేశంలో గాడిద చర్మానికి డిమాండ్ ఎక్కువై సప్లై తగ్గిపోవడంతో, చైనాకు గాడిద కష్టాలు మొదలయ్యాయి.
ఇంతకీ ఈ గాడిద తోలుతో ఏమి చేస్తారు?
గాడిద తోలు నుండి తీసే జెలిటిన్ అనే పదార్థాన్ని చైనా సాంప్రదాయ సౌందర్య సాధనాల్లో విరివిగా ఉపయోగిస్తారు. దీని కోసం ఏటా కొన్ని వందల కోట్ల డాలర్ల వ్యాపారం జరుగుతుందని అంచనా. ఇదే కాకుండా చైనాలో గాడిద మాంసానికి డిమాండ్ కూడా కాస్త ఎక్కువే. చైనాలో దీనికి డిమాండ్ ఎక్కువ కావడంతో రవాణా, వ్యవసాయ అవసరాల కోసం ఉపయోగించే గాడిదలను దొంగిలించి చైనాకు ఎగుమతి చేయడం ఊపందుకోవచ్చని ఇతర దేశాల ప్రభుత్వాలు ఆందోళన చెందుతున్నాయి.
