పాకిస్తాన్ సైన్యంలో కామాంధులు వున్నారని పస్తూన్ యాక్టివిస్ట్ ఉమర్ ఖటక్ అన్నారు. పాకిస్తాన్ లోని వజీరిస్తాన్, స్వాత్ లోయల్లో పాక్ సైన్యం అకృత్యాలకు పాల్పడుతోందనీ, ఆ ప్రాంతాల్లోని బాలికలను కిడ్నాప్ చేస్తున్నారని ఆందోళన వ్యక్తం చేశారు. కిడ్నాప్ చేసిన వారిని సెక్స్ వర్కర్లుగా మార్చేస్తున్నారనీ, ఎదురుతిరిగే వారి ఇళ్లను కూల్చివేసి వారిపై దాడులు చేస్తున్నారని ఆవేదన వ్యక్తం చేశారు.
ఈ ప్రాంత ప్రజలను హింసించి, భయపెట్టి అక్కడి నుంచి వెళ్లగొట్టేసి, తీవ్రవాదుల స్థావరాలను ఏర్పాటు చేసేందుకు పాక్ సైన్యం సన్నాహం చేస్తున్నట్లు ఆయన అనుమానం వ్యక్తం చేశారు. ఇప్పటికే పాకిస్తాన్ సైన్యం పెడుతున్న చిత్రహింసలు తట్టుకోలేక అక్కడి ప్రజలు ఆ ప్రాంతాలను వదిలేసి ఆఫ్ఘనిస్తాన్ వలస వెళ్లిపోతున్నారనీ, ఈ సంఖ్య సుమారు 5 లక్షల వరకూ ఉంటుందని వెల్లడించారు.
పాకిస్తాన్ సైన్యం చేష్టలు పిచ్చోడి చేతిలో రాయిలా మారిందనీ, వారివద్ద వున్న అణ్వాయుధాలను చెడ్డ దేశాలకు అమ్ముతూ బ్లాక్ మార్కెట్లా మారిందని మండిపడ్డారు. పాకిస్తాన్ ఆగడాలను ఎదుర్కొనేందుకు తాము పస్తూనిస్తాన్ లిబరేషన్ ఆర్మీని స్థాపించి వారి పని పడుతామని హెచ్చరించారు.
