తాము ప్రజా ఆశీర్వాదం పొందడంలో పూర్తిగా విఫలమైనట్టు వందేళ్లకు పైగా చరిత్ర కలిగిన కాంగ్రెస్ పార్టీ అభిప్రాయపడింది. తాజాగా వెలువడిన ఐదు రాష్ట్రాల అసెంబ్లీ ఎన్నికల్లో ఆ పార్టీ చిత్తుగా ఓడిపోయింది. ఉత్తరప్రదేశ్ వంటి అతిపెద్ద రాష్ట్రంలో ఏమాత్రం ప్రభావం చూపలేకపోయింది. 403 స్థానాలు ఉన్న యూపీలో కేవలం రెండంటే రెండు స్థానాలకే పరిమితమైంది.
ఈ ఫలితాలపై కాంగ్రెస్ నేత రాహుల్ గాంధీ ట్వీట్టర్ వేదికగా స్పందించారు. ప్రజాతీర్పును శిరసావహిస్తున్నట్టు తెలిపారు. అలాగే, ఆ పార్టీ అధికార ప్రతినిధి రణదీప్ సింగ్ సూర్జేవాలా స్పందిస్తూ, ఈ ఎన్నికల్లో తమ పార్టీ ఘోర పరాభవాన్ని చవిచూసిందన్నారు. ఇందుకు అనేక కారణాలు ఉన్నాయని చెప్పారు.
