ఓ మహిళా జర్నలిస్టుకు చేదు అనుభవం ఎదురైంది. పాస్ పోర్టు వెరిఫికేషన్ కోసం వచ్చిన పోలీసు జర్నలిస్టు పట్ల అభ్యంతరకరంగా ప్రవర్తించాడు ఈ ఘటన ఉత్తర్‌ప్రదేశ్‌లోని ఘజియాబాద్‌లో చోటుచేసుకుంది. పాస్పోర్ట్ వెరిఫికేషన్‌కు వచ్చిన ఓ పోలీసు అధికారి.. ఒంటరిగా ఉన్న మహిళతో అసభ్యంగా ప్రవర్తించాడు. వెరిఫికేషన్ చేసినందుకు బదులుగా కౌగిలించుకోమన్నాడు.
ఓ ప్రముఖ వార్తా సంస్థలో జర్నలిస్టుగా పనిచేస్తున్న శ్వేతా గోస్వామి అనే మహిళకు ఈ చేదు అనుభవం ఎదురైంది. దీంతో ఆమె ట్విటర్‌ వేదికగా ఈ విషయాన్ని కేంద్ర మంత్రులు రాజ్‌నాథ్‌ సింగ్, సుష్మాస్వరాజ్‌, ఘజియాబాద్‌ పోలీసుల దృష్టికి తీసుకెళ్లారు. వరుస ట్వీట్లతో తన ఆవేదన వ్యక్తం చేశారు. ఆ ట్వీట్‌లో మహిళలకు భద్రత లేకుండా పోయిందని సదరు మహిళా జర్నలిస్టు మండిపడ్డారు.
వెరిఫికేషన్ కోసం ఇంటికొచ్చి.. అవకాశం కోసం ఎదురుచూశాడు. మా ఇంట చాలాసేపు గడిపేందుకు ప్రయత్నించాడు. చివరికి వెరిఫికేషన్ పూర్తి చేశాను. తనకేం ఇస్తావని అడిగాడు. ఇంకా కౌగిలింత కావాలన్నాడు. ఆ పోలీస్ పేరు దేవేరంద్ర సింగ్ అంటూ సదరు మహిళా జర్నలిస్టు ట్వీట్ చేశారు. ఇక వేధింపులకు గురైన మహిళా జర్నలిస్టుకు మద్దతు పెరుగుతోంది. ఆమెను వేధించిన పోలీసుపై చర్యలు తీసుకోవాలని వారు నెట్టింట డిమాండ్ చేస్తున్నారు.
