తమిళ రాజకీయాలు చూస్తుంటే రోజుకో మలుపు తిరుగుతున్నాయి. ప్రతి రాష్ట్రంలోను అధికార, ప్రతిపక్ష నేతలకు మధ్య మాటల యుద్ధాలు జరుగుతుంటాయి. కానీ తమిళనాడులో మాత్రం అధికార పార్టీలోని నేతలే వేర్వేరుగా విడిపోయి ఇప్పుడు రాజకీయ రగడను కొనసాగిస్తున్నారు. జయలలిత మరణం తరువాత వారసురాలిగా చెప్పుకుంటే ఆస్థిని ఎలాగైనా సంపాదించుకోవాలని ప్రయత్నిస్తున్న దీప సొంతంగా పార్టీ పెట్టారు. ఇది అందరికీ తెలిసిందే.
అయితే పార్టీ పెద్దగా ప్రజల్లోకి వెళ్ళలేదు. దీప సేమ్ టు సేమ్ జయను పోలి ఉండటంతో కొంతమంది అన్నాడిఎంకే నేతలు ఆమె వెంట ఉండిపోయారు. దీంతో దీపకు అంతోఇంతో తమిళనాడులో పేరొచ్చింది. అంతేకాదు నేషనల్ మీడియా ఛానళ్ళను తనవైపు తిప్పుకున్న దీప అలా ఇంటర్వ్యూల మీద ఇంటర్వ్యూలు ఇచ్చేస్తూ దీప అంటే ఎవరో అందరికీ తెలిసేలా చేసేసింది. మొదట్లో పన్నీరుసెల్వంతో కలిసి ముందుకు వెళదామనుకున్న దీప ఆ తరువాత వెనక్కి తగ్గింది.
మరో రెండుమూడురోజుల్లో స్వయంగా వచ్చి మాట్లాడుతానని తన అనుచరులతో దీప కబురు కూడా పంపేసింది. అధికార పార్టీ విబేధాల కన్నా స్నేహంగా మెలిగితేనే తనకు మంచిదన్న ఆలోచనలో వచ్చేసింది దీప. అయితే దీపకు పళణిస్వామి అంటే అస్సలు ఇష్టం లేదు. పన్నీరుసెల్వంతో కలిసినా దీప పళణిస్వామితో కలుస్తుందా అన్నది ప్రస్తుతం ఆసక్తికరంగా మారుతోంది. దీప పన్నీరుసెల్వంతో కలవడం తమిళనాడులో ఇప్పుడు హాట్ టాపిక్‌గా మారింది.
