స్మార్ట్ ఫోన్ ఓకే.. ఇప్పుడేమో స్మార్ట్ రింగ్ వచ్చేస్తోంది.. నగదు రహిత చెల్లింపులు చేసుకోవచ్చట..!

పెద్ద నోట్ల రద్దుతో ప్రస్తుతం దేశంలో లావాదేవీలన్నీ కార్డులపై అవుతున్న నేపథ్యంలో.. లావాదేవీలన్నీ స్మార్ట్ ఫోన్లలో, బ్యాంకింగ్ విధానాల్లో ముగిసిపోతున్నాయి. అయితే ఉంగరం కూడా స్మార్ట్‌గా తయారైతే. ఎలాగంటే.. ఈ ఉంగరంతో సులువుగా నగదు రహిత చెల్లింపులు చేసుకోవచ్చట. ఆశ్చర్యంగా ఉంది కదూ.. అయితే ఈ స్టోరీ చదవండి. సాధారణంగా ఉంగరాలను ధరించడం ఓ ఫ్యాషన్. ప్రేమానుబంధాలకు రింగులు ధరించుకోవడం చూస్తుంటాం. 

అలాంటి అందరూ ఇష్టపడే రింగులతోనే చెల్లింపులు చేయగలిగితే ఎంత బాగుటుందో కదా.. అలాంటి దాన్నే హాంగ్‌కాంగ్‌కు చెందిన ఓ సంస్థ అలాంటి స్మార్ట్‌ రింగునే అభివృద్ధి చేసింది. ఆ రింగు చేతి వేలికి ఉంటే చాలు.. డెబిట్‌.. క్రెడిట్‌ కార్డులతో పనుండదట. దానితోనే సులువుగా నగదురహిత చెల్లింపులు చేసుకోవచ్చట. ఈ స్మార్ట్‌ ఉంగరం పేరు 'టాప్పీ'. అమెరికాలోని లాస్‌వెగాస్‌లో జరుగుతున్న వినియోగదారుల ఎలక్ట్రానిక్‌ షోలో ఈ రింగును ఆవిష్కరించారు.

వైర్‌సెల్ పేమెంట్ చిప్‌లతో కలిగివుండే ఈ రింగు స్మార్ట్ ఫోన్ యాప్ ద్వారా అనుసంధానం కావడంతో... ఆ యాప్ ద్వారా బ్యాంకు ఖాతాలకు సైతం లింకు ఏర్పరుచుకుంటుంది. దాంతో ఏ స్టోర్‌లోనైనా పేమెంట్‌ మెషీన్‌ దగ్గర రింగును చూపించి సులువుగా చెల్లింపులు చేయొచ్చట. రింగుకు ఛార్జింగ్‌ పెట్టాల్సిన అవసరం కూడా ఉండదు.

ఈ రింగుకు సంబంధించిన సాంకేతికతను జువెలరీ కంపెనీలకు అందించనున్నట్లు టాప్పీ సంస్థ తెలిపింది. వెండి.. బంగారం రెండింటితోనూ ఈ స్మార్ట్‌ రింగులను తయారు చేయొచ్చనని సంస్థ వెల్లడించింది. ఏప్రిల్‌లో అమెరికా మార్కెట్లోకి వచ్చే ఈ రింగు ధర సుమారు 7వేల వరకు ఉంటుందని తెలుస్తోంది.