వైద్య చరిత్రలోనే అత్యంత అరుదైన వైద్య కేసు ఒకటి ముంబై ఆస్పత్రిలో నమోదైంది. అపుడే పుట్టిన బిడ్డ కడుపులో మరో పిండం ఉండటాన్ని వైద్యులు కనుగొన్నారు. ఓ మహిళ జన్మనిచ్చిన పండింటి బిడ్డ కడుపులో మరో బాబు ఉన్నాడు. అంటే పుట్టుకతోనే ఆ బాబు గర్భవతుడిగా జన్మించాడన్నమాట. ఈ వింతను చూసి ఆశ్చర్యపోవడం వైద్యుల వంతైంది. తాజాగా వెలుగులోకి వచ్చిన ఈ వివరాలను పరిశీలిస్తే...
7 సెంటీమీటర్ల పొడవుతో, తల, కాళ్లు, చేతులు అభివృద్ధి చెందిన స్థితిలో మరో చిన్నారి పిండాన్ని కనుగొన్నారు. బిడ్డ పుట్టిన తొమ్మిదో రోజున విషయం తెలుసుకున్న వైద్యులు, విజయవంతంగా శస్త్రచికిత్సను చేసి ఆ పిండాన్ని బయటకు తీశారు.
ప్రస్తుతం ఆ బిడ్డ, తల్లి ఆరోగ్యంగానే ఉన్నారని, చిన్నారి గర్భవతుడి కడుపు నుంచి 150 గ్రాముల బరువున్న పిండాన్ని వెలికితీశామని తెలిపారు. ఇది అత్యంత అరుదైన కేసని తెలిపారు. ఈ తరహా కేసులో ప్రపంచ వ్యాప్తంగా మహా అయితే ఓ 200 కేసులు ఉంటాయని వైద్యులు చెపుతున్నారు.
