దేశ వ్యాప్తంగా కరెన్సీ కష్టాలు తారా స్థాయిలో ఉన్నాయి. కొత్త నోట్లతో పాటు.. చిల్లర కోసం దేశ ప్రజలంతా వెంపర్లాడుతున్నారు. కానీ, కోల్‌కతాలోని ఒక వైద్యుడి వద్ద ఏకంగా 10 లక్షల రూపాయల కొత్త కరెన్సీ నోట్లు దొరికాయి. దాంతోపాటు వివిధ దేశాలకు చెందిన రూ.4 లక్షల విలువ చేసే కరెన్సీ కూడా దొరికింది. దీంతో అతడిపై ఫెమా, పీఎంఎల్ఏ చట్టాల కింద ఈడీ అధికారులు కేసులు పెట్టారు.
కోల్‌కతాలో ఆరు, భువనేశ్వర్‌లో రెండు, పారాదీప్‌లో రెండు, గువాహతిలో రెండుచోట్ల ఈడీ అధికారులు సోదాలు చేశారు. ఈ సోదాల్లో భాగంగానే కోల్‌కతా వైద్యుడి బండారం బయటపడింది. పది లక్షల రూపాయల కొత్త కరెన్సీ ఒక్కరి దగ్గరే బయటపడటం అంటే చిన్న విషయం కాదని, దీన్ని ఖచ్చితంగా నల్లధనంతోనే మార్పిడి చేసుకుని ఉంటారని అనుమానిస్తున్నారు.
