తెలంగాణ రాష్ట్ర రాజకీయాల్లో ఫైర్‌బ్రాండ్‌గా ముద్రపడిన సినీ నటి విజయశాంతి. ఈమె ప్రస్తుతం కాంగ్రెస్ పార్టీలో ప్రచార కమిటీ అధ్యక్షురాలిగా ఉన్నారు. అయితే, ఆ పార్టీలో ఉన్న నేతలతో ఆమెకు పొసగక... గత కొంతకాలంగా దూరంగా ఉంటూ వస్తున్నారు. అదేసమయంలో బీజేపీ ఆకర్ష్ పేరుతో కమలనాథులు ఆమెకు గాలం వేశారు. ఆమెతో జరిపిన చర్చలు ఫలవంతమయ్యాయి. దీంతో బీజేపీలో చేరేందుకు ఆమె ముహూర్తం ఫిక్స్ చేసుకున్నట్టు వార్తలు వస్తున్నాయి.
తెలంగాణ కాంగ్రెస్ వ్యవహారాల ఇన్‌ఛార్జ్ మాణికం ఠాగూర్‌ ఇంకా ముందు వచ్చి ఉంటే.. కాంగ్రెస్ పరిస్థితి మెరుగయ్యేదేమోనన్న ఆమె వ్యాఖ్యలు కాంగ్రెస్‌లో కలకలం రేపాయి. కాంగ్రెస్ పట్ల అసంతృప్తి వ్యక్తం చేస్తూనే.. తెరాస పార్టీ భయబ్రాంతులకు గురిచేసి నేతలను చేర్చుకునే ప్రయత్నం చేస్తోందని విజయశాంతి ఆరోపించారు. తెరాసకు సవాల్‌ విసిరే స్థాయికి బీజేపీ వచ్చిందని రాములమ్మ చెబుతున్నారు.
కాగా, రాములమ్మ రాజకీయ జీవితాన్ని పరిశీలిస్తే, వాస్తవానికి ఈమె బీజేపీతోనే రాజకీయ ఓనమాలు నేర్చుకున్నారు. భారతీయ మహిళా మోర్చా జాతీయ కార్యదర్శిగా పనిచేశారు. ఆ తర్వాత బీజేపీ నుంచి బయటకు వచ్చి.. తల్లి తెలంగాణ పార్టీని స్థాపించారు. ఆ పార్టీని టీఆర్‌ఎస్‌లో విలీనం చేశారు. టీఆర్‌ఎస్ నుంచి 2009 ఎన్నికల్లో ఎంపీగా విజయం సాధించారు.
