మరో బాలీవుడ్ దంపతుల జంట వేరుపడింది. కోర్టు తీర్పుతో 16 యేళ్ల వైవాహిక బంధం మంగళవారంతో ముగిసిపోయింది. ఆ జంట ఎవరో కాదు... బాలీవుడ్ నటుడు, రచయిత, దర్శకుడు ఫర్హాన్ అఖ్తర్, ఆయన భార్య అధూనా భంబానీని. వీరిద్దరు చట్టపరంగా విడాకులు పొందారు.
స్టైలిస్ట్ అయిన అధూనా భాబానీని ఫర్హాన్ అఖ్తర్ గత 2000 సంవత్సరంలో వివాహం చేసుకున్నాడు. వారి ప్రేమ, వైవాహిక బంధానికి గుర్తుగా శక్య, అకీరా అనే ఇద్దరు పిల్లలు కూడా ఉన్నారు. అయితే, కాలక్రమంలో వారిద్దరి మధ్య ఏర్పడిన మనస్పర్థలు 2016లో ముంబైలోని బాంద్రాలో ఫ్యామిలీ కోర్టును ఆశ్రయించేలా చేశాయి.
వీరిద్దరి విడాకుల కేసును ఆశ్రయించిన కోర్టు... వీరిద్దరికి విడాకులు మంజూరు చేసింది. శక్య, అకీరాల బాధ్యతలు తల్లి అధూనా భంబానీకి అప్పగించారు. పిల్లలను చూసేందుకు ఫర్హాన్ ఎప్పుడైనా వెళ్లే అవకాశాన్ని కోర్టు కల్పించింది. దీంతో విడాకులు తీసుకున్న బాలీవుడ్ జంటల్లో ఫర్హాన్ జంట కూడా చేరింది.
